-
नवी दिल्ली: पंतप्रधान नरेंद्र मोदींच्या नव्या केंद्रीय मंत्रिमंडळात नारायण राणे, कपिल पाटील, भागवत कराड आणि डॉ. भारती पवार यांना स्थान मिळाले असून या चार मंत्र्यांमुळे राज्याला मिळालेल्या मंत्रीपदाची संख्या आठ झाली आहे.
-
अकोल्याचे खासदार व शिक्षण राज्यमंत्री संजय धोत्रे आणि माहिती व प्रसारणमंत्री प्रकाश जावडेकर यांची मात्र वगळण्यात आले आहे.
-
महाराष्ट्रातून केंद्रीय मंत्री नितीन गडकरी (रस्तेबांधणी व राष्ट्रीय महामार्ग विकासमंत्री)
-
केंद्रीय मंत्री पियुष गोयल (रेल्वेमंत्री व उद्योगमंत्री)
-
ग्राहक संरक्षण व नागरी पुरवठा राज्यमंत्री रावसाहेब दानवे या तिघांचे मंत्रीपद कायम राहिले आहे.
-
मंत्रिमंडळाच्या फेरबदलापूर्वी राष्ट्रीय लोकशाही आघाडीतील एकमेव घटक पक्ष असलेल्या रिपब्लिकन पक्षाचे प्रमुख रामदास आठवले यांच्याकडील सामाजिक न्याय राज्यमंत्रीपदाची जबाबदारीही कायम ठेवण्यात आली आहे.
-
केंद्रीय मंत्रिमंडळाच्या नव्या रचनेत डॉ. भारती पवार या राज्यातून मंत्रीपद मिळालेल्या एकमेव महिला मंत्री आहेत.
-
केंद्रीय मंत्रिमंडळाच्या विस्तारात समावेश झालेल्या राज्यातील चौघांपैकी तिघे हे काँग्रेस वा राष्ट्रवादीमधून भाजपमध्ये प्रवेश केलेले आहेत.
नारायण राणे : माजी मुख्यमंत्री १) शिवसेना, काँग्रेस, भाजप असा तीन पक्षांचा राजकीय प्रवास. २) मुंबई महानगरपालिके त नगरसेवक, बेस्ट समितीचे अध्यक्ष, आमदार, दुग्धविकास, महसूलमंत्री, मुख्यमंत्री, विरोधी पक्षनेते, मुख्यमंत्रिपद भूषविल्यावर पुन्हा मंत्रिपद (महसूल व उद्योग), काँग्रेस आमदार, भाजपकडून राज्यसभा सदस्यत्व व आता केंद्रीय मंत्री. तिन्ही पक्षांमध्ये महत्त्वाची पदे. ३) २०१४ मध्ये कुडाळ आणि वांद्रे पूर्व (पोटनिवडणूक) अशा दोन मतदारसंघांमधून विधानसभेत पराभव. ४) पुत्र नीलेश राणे यांचा रत्नागिरी-सिंधुदुर्ग लोकसभा मतदारसंघात लागोपाठ दोनदा पराभव. दुसरे पुत्र नितेश राणे हे लागोपाठ दुसऱ्यांदा आमदार. 
५) लागोपाठ दोन पराभवानंतरही काँग्रेसकडून विधान परिषदेची आमदारकी. ६) बेहिशेबी मालमत्ताप्रकरणी अंमलबजावणी संचालनालयाच्या रडारवर आल्यानेच केंद्रातील भाजपशी जुळवून घेतल्याचा तेव्हा आरोप झाला होता. राणे यांनी हा आरोप फेटाळला होता. ७) शिवसेनेत उद्धव ठाकरे तर काँग्रेसमध्ये राहुल गांधी या दोन्ही पक्षांमधील सर्वोच्च नेतृत्वावर आरोप करीत दोन्ही पक्ष सोडले होते. ८) काँग्रेस पक्षाला रामराम ठोकल्यावर भाजपने लगेचच पक्षात प्रवेश दिला नव्हता. सुमारे दोन वर्षे स्वाभिमान पक्षाच्या वतीने राजकारणात सक्रिय. ९) १९७१ ते १९८४ केंद्र सरकारी सेवेत नोकरी. १०) राज्यसभा सदस्य 
डॉ. भारती पवार : केंद्रीय मंत्रिमंडळात नाशिकच्या नेत्यास प्रथमच संधी. १) दिवंगत माजी मंत्री ए. टी. पवार यांच्या स्नुषा. २) जिल्हा परिषदेचे दोन वेळा सदस्यत्व. ३) राष्ट्रवादी काँग्रेसच्या माजी प्रदेश उपाध्यक्ष. ४) २०१४ च्या लोकसभा निवडणुकीत राष्ट्रवादीच्या तिकिटावर पराभूत. 
५) लोकसभेच्या २०१९ मधील निवडणुकीत राष्ट्रवादीने उमेदवारी नाकारल्यानंतर भाजपमध्ये प्रवेश. ६) २०१९ च्या निवडणुकीत भाजपकडून विद्यमान खासदार हरिश्चंद्र चव्हाण यांच्याऐवजी उमेदवारी. ७) नाशिक जिल्ह्य़ातील पहिल्या महिला खासदार. ८) नाशिक जिल्ह्य़ातील दिंडोरी मतदारसंघाचे लोकसभेत प्रतिनिधित्व करीत आहेत. 
डॉ. भागवत कराड : औरंगाबाद शहराचे माजी महापौर. १) मराठवाडा वैधानिक विकास मंडळाचे अध्यक्ष. २) १९९५ पासून महानगरपालिका राजकारणात सक्रिय. ३) विधानसभा निवडणुकीत अल्प मतांनी पराभव. ४) बालरोगतज्ज्ञ. ५) भाजपमध्ये संघटनात्मक पातळीवर विविध पदे भूषविली. 
६) पंकजा मुंडे यांना राजकीयदृष्ट्या शह देण्याकरिताच वंजारी समाजातील डॉ. कराड यांना भाजपने मागे राज्यसभेची खासदारकी दिली. मुंडे यांची दुसरी कन्या व बीडच्या खासदार प्रीतम मुंडे यांच्याऐवजी डॉ. कराड यांना मंत्रिमंडळात संधी दिल्याने मुंडे कुटुंबीयांना भाजपकडून सूचक इशारा. ७) डॉ. भागवत कराड यांना केंद्रात मंत्रिपद तर रमेश कराड यांना विधान परिषद देऊन भाजपने विधानसभा निवडणुकीतील पराभवानंतर पक्ष नेतृत्वावर दबाव वाढविणाऱ्या पंकजा मुंडे यांचे पंख कापले. ८) भाजपचा वंजारी समाजाचा चेहरा म्हणून डॉ. कराड यांचे नेतृत्व प्रस्थापित करण्यावर भर. ९) चार नवीन मंत्र्यांमध्ये मूळचे भाजपचे एकमेव मंत्री. १०) राज्यसभा सदस्य. 
कपिल पाटील : राष्ट्रवादी काँग्रेसमधून २०१४च्या लोकसभा निवडणुकीपूर्वी भाजपमध्ये प्रवेश. २०१४ व २०१९ मध्ये भिवंडी मतदारसंघातून विजयी. १) ठाणे जिल्हा परिषदेचे सदस्य, विषय समितीचे सभापतिपद, उपाध्यक्ष व अध्यक्ष अशी चढती कमान. २) भिवंडी पंचायत समितीचे सभापती. ३) ठाणे जिल्हा मध्यवर्ती सहकारी बँके चे अध्यक्ष. 
४) २०१९ मध्ये भाजप संसदीय पक्षाचे प्रतोद. ५) ठाणे जिल्ह्यातील शिवसेनेच्या वर्चस्वाला शह देण्याकरिता पाटील यांना मंत्रिमंडळात संधी. ६) दि. बा. पाटील यांचे नवी मुंबईतील विमानतळाला नाव द्यावे म्हणून सुरू असलेल्या आंदोलनाच्या पार्श्वभूमीवर आगरी समाजातील पाटील यांना मंत्रिपद देऊन आगरी समाजाला जवळ करण्याचा भाजपचा प्रयत्न. -
(सर्व फोटो सौजन्य : ट्विटर)
छत्रपती शिवाजी महाराजांचा गनिमीकावा अन् मराठा लष्करी इतिहास, JNU मध्ये आता विशेष केंद्र; कधी सुरू होणार अभ्यासक्रम
