-
गेल्या काही दिवसांपासून देशात पुन्हा करोनाचे रुग्ण सातत्याने वाढत आहेत.
-
तर, करोनाचा नवीन प्रकार ओमायक्रॉन ज्यामुळे अनेक देशांमध्ये करोनाचे रुग्ण झपाट्याने वाढले, त्याचा संसर्गही देशात वाढतोय.
-
देशात दैनंदिन रुग्ण २ लाखांपेक्षा जास्त आढळू लागले आहेत.
-
देशात ओमायक्रॉनचे सध्या ५ हजार ४८८ रुग्ण आहेत.
-
आता सापडत असलेल्या बहुतांशी रुग्णांना करोनाची सौम्य लक्षणं आढळत असल्यानं रुग्णालयात भरती होण्याचं प्रमाण कमी आहे.
-
ओमिक्रॉनची वाढती प्रकरणे पाहता WHO लोकांना वारंवार सावधगिरी बाळगण्याचे आवाहन करत आहे.
-
बुधवारी पत्रकार परिषदेत डब्ल्यूएचओचे प्रमुख टेड्रोस अधानोम यांनी लोकांना ओमिक्रॉनच्या धोक्यांचा इशारा दिला.
-
टेड्रोस म्हणाले, की करोनाचा ओमायक्रॉन प्रकार अतिशय धोकादायक आहे.
-
यावेळी, ओमायक्रॉनचा सर्वाधिक धोका कोणाला आहे, यासंदर्भात WHO प्रमुखांनी उत्तर दिलंय.
-
ज्यांनी अद्याप लस घेतलेली नाही, त्यांच्यासाठी करोना जास्त धोकादायक आहे.
-
तर, ओमायक्रॉनमुळे जगभरात करोनाचे रुग्ण वाढले आहेत, परंतु त्याविरुद्ध लढण्याचे धैर्य आपण गमावू नये, असं आवाहन त्यांनी केलंय.
-
टेड्रोस म्हणाले, जरी ओमायक्रॉन डेल्टापेक्षा कमी गंभीर असला तरीही हा लसीकरण न केलेल्या लोकांसाठी एक धोकादायक विषाणू आहे.
-
त्यामुळे लोकांनी करोना प्रतिबंधक लस घ्यायलाच हवी.
-
दरम्यान, आफ्रिकेत, ८५ टक्क्यांहून अधिक लोकांना अद्याप लसीचा डोस मिळालेला नाही. जोपर्यंत आम्ही ही लसीतील तफावत दूर करत नाही तोपर्यंत आम्ही साथीच्या रोगाचा अंत करू शकत नाही, असं ते म्हणाले.
-
प्रत्येक देशाने सप्टेंबर २०२१ पर्यंत आपल्या लोकसंख्येच्या १० टक्के, डिसेंबरच्या अखेरीस ४० टक्के आणि २०२२ च्या मध्यापर्यंत ७० टक्के लसीकरण करावे, अशी टेड्रोस यांची इच्छा होती.
-
परंतु ९० देश अजूनही ४० टक्क्यांपर्यंत पोहोचलेले नाहीत, त्यापैकी ३६ देशांमध्ये अजूनही 10 टक्क्यांपेक्षा कमी लसीकरण आहे.
-
ते म्हणाले, की जगभरातील रुग्णालयात दाखल करण्यात आलेले बहुतेक लोक असे आहेत ज्यांना लस मिळालेली नाही.
-
लस करोना आणि मृत्यूच्या गंभीर धोक्यापासून संरक्षण करते, असंही त्यांनी सांगितलं.
-
डब्ल्यूएचओ प्रमुख म्हणाले, इतकेच नाही तर करोनाचे आणखी प्रकार येण्याचा धोका अजूनही आहे.
-
हे प्रकार ओमायक्रॉनपेक्षा वेगाने पसरू शकतात आणि अधिक प्राणघातक असू शकतात.
-
टेड्रोस म्हणाले की, जगभरात करोनामुळे होणाऱ्या मृत्यूंची संख्या दर आठवड्याला सुमारे ५० हजारांवर पोहोचली आहे.
-
या विषाणूसोबत जगायला शिकण्याचा अर्थ असा नाही की आपण इतके मृत्यू स्वीकारू लागलो आहोत, असंही ते म्हणाले.
-
ओमायक्रॉन हा घातक नसून सौम्य आहे, असं सांगणंच धोकादायक असल्याचं जागतिक आरोग्य संघटनेनं यापूर्वी म्हटलंय.
-
संसर्गजन्य रोग एपिडेमियोलॉजिस्ट आणि डब्ल्यूएचओच्या कोविड-१९ च्या टेक्निकल लीड मारिया व्हॅन केरखोव्ह म्हणाल्या होत्या की, “ओव्हरसिम्पलीफाइड नॅरेटिव्ह धोकादायक असू शकतात.
-
डेल्टाच्या तुलनेत ओमायक्रॉनचा हॉस्पिटलायझेशनचा धोका कमी दिसतोय. परंतु फक्त त्यामुळे ओमायक्रॉन हा एक सौम्य आजार आहे, असं म्हणणं धोकादायक आहे.
-
कमी जोखीम असतानाही वाढती रुग्णसंख्या आश्चर्यचकित करणारी आहेत, त्यामुळे येत्या काळात रुग्णालयांमध्ये जागा मिळणार नाही. त्यामुळे सावधगिरी बाळगा,” असं आवाहन त्यांनी केलेलं.
-
यापूर्वी अनेकदा जागतिक आरोग्य संघटनेनं ओमायक्रॉनला गांभीर्यानं घेण्याचा सल्ला दिलाय.
-
ओमायक्रॉन म्हणजे सर्वसाधारण सर्दी नाही.
-
यामुळे आरोग्य व्यवस्था कोलमडण्याची भीती आहे, असं जागतिक आरोग्य संघटनेच्या मुख्य शास्त्रज्ञ सौम्या स्वामीनाथन म्हणाल्या होत्या.
-
त्यामुळे मोठ्या प्रमाणात लोकांच्या करोना चाचण्या करण्यात याव्यात. तसेच त्या रुग्णाचे निरीक्षण करण्यात यावे. जेणेकरुन करोनाची लाट येण्याआधीच आपण सज्ज असू, असे स्वामीनाथन म्हणाल्या होत्या.
-
लसीकरण वेगाने करुन आपण करोना रुग्णाचं संक्रमण अथवा संसर्ग टाळू शकतो, त्यामुळे अनेकांचे जीव वाचू शकतात, असे जागतिक आरोग्य संघटनेच्या महामारी शास्त्रज्ञ डॉ. मारिया व्हॅन केरखोव्ह यांनी सांगितलं.
-
दरम्यान, जागतिक आरोग्य संघटनेनं मंगळवारी सांगितले की, श्वसनमार्गाच्या वरील भागावर ओमायक्रॉन व्हेरियंट परिणाम करत असल्याचे संशोधनातून उघड झाले आहे. त्यामुळे इतर व्हेरियंटच्या तुलनेत ओमायक्रॉनची लक्षणे सौम्य आढळत आहेत.
-
(सर्व छायाचित्रे -प्रातिनिधीक आणि संग्रहित)
“बायकोने सांगितलंय…”, पठ्ठ्याने बाइकच्या मागे लिहिलं ‘असं’ काही की, वाचून पोट धरून हसाल
