PHOTOS : ब्रिटनमध्ये मजूर पक्षाची नेत्रदीपक कामगिरी, कीर स्टार्मर नवे पंतप्रधान; हुजूर पक्षाचा ऐतिहासिक पराभव!

1/12

ब्रिटनमध्ये झालेल्या संसदीय निवडणुकीमध्ये मजूर पक्षाने (लेबर पार्टी) ६५० सदस्यीय कनिष्ठ सभागृहामध्ये ४१२ जागांवर विजय मिळवत तब्बल १४ वर्षांनी सत्तेत पुनरागमन केले. मजूर पक्षाने नेत्रदीपक कामगिरी बजावताना २११ जास्त जागा अधिक मिळवल्या आहेत. (AP)

2/12

पंतप्रधान ऋषी सुनक यांच्या नेतृत्वाखाली सत्तारूढ हुजूर पक्षाचा (कॉन्झर्व्हेटिव्ह) ऐतिहासिक दारुण पराभव झाला. सुनक यांच्या पक्षाचा पराभव इतका मोठा असेल याचा फारसा अंदाज नव्हता. सत्ताधारी हुजूर पक्षाला १२१ जागा मिळाल्या असून आधुनिक ब्रिटनच्या इतिहासातील ही या पक्षाची सर्वांत वाईट कामगिरी ठरली. हुजूर पक्षाच्या २५० जागा कमी झाल्या आहेत. दरम्यान, सुनक यांनी उत्तर इंग्लंडमधील रिचमंड अँड नॉर्थआलर्टन या मतदारसंघात विजय मिळवला आहे. (Reuters)

3/12

ब्रिटनमध्ये सरकार स्थापन करण्यासाठी कनिष्ठ सभागृहात किंवा हाउस ऑफ कॉमन्समध्ये किमान ३२६ जागा मिळवणे आवश्यक होते. तो आकडा मजूर पक्षाने अगदी आरामात पार केला. (Reuters)

4/12

नवीन पंतप्रधान कीर स्टार्मर यांनी दिलेल्या ‘राष्ट्रीय नूतनीकरणा’च्या घोषणेला ब्रिटनच्या जनतेने भरभरून पाठिंबा दिल्याचे या निकालातून दिसते. आता बदलाला सुरुवात झाली आहे असे मत स्टार्मर यांनी निकालानंतर केलेल्या पहिल्या भाषणात व्यक्त केले. (AP)

5/12

पराभवानंतर ऋषी सुनक म्हणाले…
मजूर पक्षाने सार्वत्रिक निवडणुकीत विजय मिळवला आहे आणि मी सर कीर स्टार्मर यांचे विजयाबद्दल अभिनंदन करतो. आमच्या पक्षाचा पराभव झाला आहे आणि मी त्याची जबाबदारी स्वीकारतो. (AP)

6/12

विजयानंतर कीर स्टार्मर म्हणाले…
आता बदलाला सुरुवात होत आहे. प्रामाणिकपणे सांगायचे तर यामुळे बरे वाटत आहे. अशा निकालाबरोबर मोठी जबाबदारीही येते. आम्हाला आपला देश एकसंध ठेवण्यासाठी कल्पनांचे नूतनीकरण करावे लागणार आहे. राष्ट्रीय नूतनीकरण. तुम्ही कोणीही असा, कुठूनही सुरुवात करा, जर तुम्ही कठोर परिश्रम केले, नियमांचे पालन केले तर हा देश तुम्हाला समान संधी देईल. (AP)

7/12

दरम्यान, माजी पंतप्रधान लिझ ट्रस यांना पक्षाचा बालेकिल्ला साउथ वेस्ट नॉरफोकमधून पराभव पत्करावा लागला या जागेवर त्यांचे २०१० पासून वर्चस्व होते. (AP)

8/12

सात पराभवांनंतर, निजेल फॅरेज यांनी वेस्टमिन्स्टरमध्ये विजय मिळवला. त्यांच्या रिफॉर्म यूके पक्षासाठी ही एक उल्लेखनीय कामगिरी ठरली आहे. यूकेमधील युरोसेप्टिसिझमचा चेहरा असलेल्या फॅरेज यांनी यूके इंडिपेंडन्स पार्टी (यूकेआयपी) चे नेते म्हणून ब्रेक्झिटसाठी प्रचार केला होता. फारेज हे विविध राजकीय पक्षांशी संबंधित आहेत. (Reuters)

9/12

शिख समुदायाचे १० सदस्य
पाच महिला आणि पाच पुरुषांसह सर्व १० नवनिर्वाचित शीख खासदार मजूर पक्षाचे आहेत. (एक्स्प्रेस)

10/12

हुजूर पक्षाचा पराभव का?
गेल्या पाच वर्षांमध्ये तब्बल तीन पंतप्रधान देणाऱ्या हुजूर पक्षाच्या कार्यकाळात ब्रिटनच्या जनतेचे राहणीमान घसरले. सर्वसामान्य ब्रिटिश नागरिकांना किफायतशीर दरात उत्तम आरोग्य सेवा पुरवणाऱ्या ‘नॅशनल हेल्थ सर्व्हिस’ची (एनएचएस) वाताहत झाली असून, डॉक्टरांच्या भेटीची वेळ मिळवण्यासाठी कित्येक महिने रखडावे लागत आहे. सत्ता सोडताना, नागरिकांचे जीवनमान खालावण्याची कामगिरी करणारा हुजूर पक्ष हा ब्रिटनमधील पहिला पक्ष ठरला आहे. (AP)

11/12

मोदींकडून स्टार्मर यांचे अभिनंदन
पंतप्रधान नरेंद्र मोदी यांनी ब्रिटनचे नियोजित पंतप्रधान कीर स्टार्मर यांचे विजयाबद्दल अभिनंदन केले. दोन्ही देशांदरम्यान सर्वसमावेशक सामरिक भागीदारी अधिक मजबूत होण्यासाठी सकारात्मक आणि रचनात्मक भागीदारीची आपल्याला आशा आहे असे मोदी यावेळी म्हणाले. तसेच, मोदी यांनी मावळते पंतप्रधान ऋषी सुनक यांच्या नेतृत्वगुणांचीही प्रशंसा केली आणि त्यांना शुभेच्छा दिल्या.

12/12

स्कॉटलंडमधील ग्लासगो येथे मतमोजणी सुरू असताना, स्कॉटिश कामगार नेते अनस सरवर मजूर पक्षाच्या सदस्यांसह. (Reuters) (हेही वाचा- PHOTOS : T20 विश्वचषकाच्या ट्रॉफीला हात न लावता नरेंद्र मोदींनी काढला फोटो, काय आहे कारण?)