-
विधानसभा निवडणुकीच्या पार्श्वभूमीवर गुरुवारी (२५ जुलै) वांद्रे येथील रंगशारदा सभागृहात महाराष्ट्र नवनिर्माण सेनेच्या प्रमुख पदाधिकाऱ्यांचा मेळावा आयोजित करण्यात आला होता. त्यावेळी राज ठाकरे बोलत होते.
-
“सध्या जनतेच्या मूळ प्रश्नांकडे कोणाचं लक्ष नाही. सगळे व्यस्त आहेत ‘लाडकी बहीण’, ‘लाडक्या भावात’. लाडकी बहीण, लाडका भाऊ एकत्र आले असते तर दोन्ही पक्ष टिकले असते. मुळात अशा योजना राबवायला राज्यसरकारकडे पैसे आहेत का? सरकारकडे रस्त्यांवरचे खड्डे बुजवायला पैसे नाहीत, योजनांना कुठून पैसे येणार?”, अशा शब्दात राज ठाकरेंनी महायुती सरकारला लक्ष्य केले.
-
दरम्यान, राज ठाकरे यांनी या भाषणात थोडे मिश्कील वक्तव्य करत, पाण्याच्या योग्य नियोजनावर बोट ठेवले. ते म्हणाले, “दरवर्षी मे महिना आला की, पाऊस पडेल का? पडला तर पुरेसा पडेल का? दुष्काळ तर नाही ना पडणार? अशा चिंतांनी महाराष्ट्र ग्रासलेला असतो. पण म्हणून जे पाणी पावसाच्या रूपाने येतं त्याचं नियोजन आपण करत नाही. आपण आपली जंगलं पण वाचवत नाही. कुठलंही सरकार असू दे त्याला या गोष्टीशी काही घेणंदेणं नाही.”
-
राज ठाकरे पुढे म्हणाले, “सध्या या सर्वांकडे कोणाचं लक्ष नाहीये. जनतेचे प्रश्न हाच आपला या निवडणुकीत प्रचाराचा मुद्दा असेल. त्यामुळे, कोणत्याही परिस्थितीत आपल्या लोकांना सत्तेत बसवायचे आहे. आपल्याला किमान २०० ते २२५ जागा लढायच्या आहेत. त्यासाठी कोणाच्या युतीच्या प्रस्तावाची वाट पाहू नका, स्वबळावर निवडणुकीच्या तयारीला लागा,” असे आदेश मनसे अध्यक्ष राज ठाकरे यांनी कार्यकर्त्यांना दिले.
-
यावेळी मनसेचे सर्व नेते, सरचिटणीस, विभागप्रमुख, विभाग अध्यक्षांसह इतर अनेक पदाधिकारी उपस्थित होते.
-
“विधानसभा निवडणुकीसाठी सर्वच जण तयारीला लागलो आहोत. युती होणार की नाही, हा विचार तुम्ही करू नका, परंतु आपण २०० ते २२५ जागा लढणार आहोत”, असे राज ठाकरे यावेळी म्हणाले.
-
तसेच १ ऑगस्टनंतर राज्याच्या दौरा करणार असल्याचे ठाकरे यांनी जाहीर केले.
-
त्यामुळे महायुतीने समाधानकारक जागा दिल्या नाहीत तर स्वबळावर निवडणुका लढण्याची तयारी मनसेने सुरू केली आहे.
-
राज्याच्या खऱ्या प्रश्नाकडे लक्ष द्यायला कोणालाच वेळ नाही. लोकांच्या प्रश्नांकडे आपण लक्ष दिले पाहिजे. जनहिताचे प्रश्न हाच मनसेच्या प्रचाराचा मुद्दा असला पाहिजे, असे त्यांनी यावेळी नमूद केले.
![Sarvajanik Ganesh Mandal Banner Goes Viral on Mahaprasad Will Be Given Only To Members netizens reacts](https://www.loksatta.com/wp-content/uploads/2024/09/New-Project-30-2.jpg?w=300&h=200&crop=1)
“एवढा माज बरा नाही” सार्वजनिक गणेश मंडळाचा बॅनर पाहून लोक भडकले; PHOTO पाहून सांगा अशा मंडळांचं काय करायचं?