-
रायगड जिल्ह्यात झालेल्या अतिवृष्टीमुळे महाड तालुक्यातील तळई येथे मोठी दुर्घटना घडली आहे. या ठिकाणी दरड कोसळून ३२ जणांचा मृत्यू झाला आहे. तर, याच भागातील साखर सुतारवाडी येथे देखील चौघांचा मृत्यू झाल्याची घटना समोर आली आहे. तळई येथील घटनेतील मृतांची संख्या वाढण्याची भीती व्यक्त करण्यात आली आहे. तळई येथे दरड कोसळल्यानंतर याखाली जवळपास ३२ घरे दबली गेली होती. सकाळी या ठिकाणी मदत व बचाव कार्य सुरू करण्यात आले होते.
-
साताऱ्यातील पाटण, जावळी, वाई तालुक्यांमध्ये दरड कोसळून एकूण आठ जणांचा मृत्यू झाला आहे. जावळी व वाई या तालुक्यांमध्ये प्रत्येकी दोन असे एकूण चार जण पुराच्या पाण्यात वाहून गेली आहेत. पाटण तालुक्यातील ढोकावळे येथे डोंगर कोसळल्यामुळे चार लोक मृत्युमुखी पडले आहेत. तर, इतर लोकांना गावातील मंदिरात आश्रय देण्यात आला आहे. याचबरोबर रस्त्यावर पाणी असल्यामुळे मदतकार्यात अडथळे निर्माण होत असून अडकलेल्या सर्व लोकांना सुरक्षित स्थळी हलवण्याची मागणी होत आहे.
-
रत्नागिरी जिल्ह्यात गुरुवारपासून कोसळत असलेल्या मुसळधार पावसामुळे अनेक ठिकाणी दरडी कोसळण्याचे प्रकार घडत आहेत. अशातचं खेड तालुक्यातील मौजे पोसरे धामणन बौद्धवाडी येथे दरड कोसळल्याने कोसळल्याने सात कुटुंबातील १७ जण ढिगाऱ्याखाली अडकल्याची माहिती समोर आली आहे.
-
सातारा जिल्ह्यात पावसाने रौद्ररूप धारण केल्याने दरड कोसळून ढिगाऱ्याखाली चार घरे दबली गेल्याची धक्कादायक घटना समोर आली आहे. यामध्ये १४ लोक अडकली असल्याची भीती व्यक्त होत आहे. ही मोठी दुर्घटना काल रात्रीच्या सुमारास पाटण तालुक्यातील मोरणा विभागात खालचे आंबेघर येथे घडली. याचबरोबर कोयनानगर, मिरगाव येथेही दरडी कोसळल्या आहेत.
-
सध्या संपूर्ण महाराष्ट्राला पावसाने झोडपलं असून अनेक ठिकाणी जनजीवन विस्कळीत झालं आहे. मुसळधार पावसामुळे अनेक ठिकाणी नद्यांना पूर आला असून यामुळे झालेल्या दुर्घटनांमध्ये काही लोकांना आपला जीव गमवावा लागला आहे. वर्ध्याच्या समुद्रपूर तालुक्यातील वाघाडी नदीच्या पुराच्या प्रवाहात मालक आणि बैलांसह बैलगाडी वाहून गेल्याची धक्कादायक घटना घडली आहे. मनाला चटका लावणारी ही घटना कॅमेऱ्यात कैद झाली आहे. तालुका प्रशासनाकडून शोध मोहीम सुरु असून अद्याप त्यांचा शोध लागलेला नाही.
-
राज्यात अनेक ठिकाणी मुसळधार पावसाने थैमान घातल्याने पूर परिस्थिती निर्माण झालेली आहे. कित्येक ठिकाणी दरडी कोसळल्याच्या घटना घडल्या आहेत. तर, गावांना पूराने वेढा दिल्याने नागरिक अडकले आहेत. या नागरिकांच्या मदतीसाठी भारतीय नौदलाकडून युद्धपातळीवर बचावकार्य सुरू करण्यात आलं आहे. राज्यातील अनेक भागांमध्ये नेव्हीची पथक दाखल झाली असून, नागरिकांना सुरक्षित स्थळी नेलं जात आहे.
-
मुसळधार पावसामुळे महाराष्ट्राची राजधानी मुंबईत मोठी दुर्घटना घडली आहे. मुंबईतील गोवंडी भागात इमारतीचा भाग कोसळल्याने तीन जणांचा मृत्यू झाला आहे. या घटनेत सात जण जखमीही झाले आहेत, ज्यांना उपचारासाठी रुग्णालयात दाखल करण्यात आले आहे. मुंबईत गुरुवारी थोड्या वेळाच्या विश्रांतीनंतर मुसळधार पाऊस पडत होता. त्यामुळे रस्ते आणि रेल्वे रुळांवर पाणी जमा झाले होते. दरम्यान, रेल्वे व रस्ते वाहतुकीवर परिणाम झाला आहे.
-
मावळच्या तुंग किल्ल्याच्या पायथ्याशी असलेल्या घरावर दरड कोसळल्याने घर जमीनदोस्त झाल्याची घटना समोर आली आहे. दैव बलवत्तर असल्याने घरातील ११ जणांचे प्राण वाचले आहेत. तर, आजूबाजूला मोठ्या प्रमाणावर जमीन खचल्याचं निदर्शनास आल्याने गावकऱ्यांच्या मनात भीती निर्माण झाली आहे. दरड कोसळून सीताराम पठारे यांच्या घराचे आणि किराणा दुकानाचे मोठे नुकसान झाले आहे.
-
राज्यातील अनेक भागात मुसळधार पाऊस सुरू असून असाच पाऊस पुणे शहराला पाणी पुरवठा करणार्‍या खडकवासला धरण साखळीत देखील जोरदार पाऊस सुरू आहे. तर मागील चोवीस तासांत पाच टीएमसी एवढा पाऊस झाला आहे. यामुळे खडकवासला धरणातून मुठा नदी पात्रात २ हजार ५५३ इतका सुरू असल्याचे पाटबंधारे विभागामार्फत सांगण्यात आले आहे.
-
कोल्हापुरातील पंचगंगा नदी धोका पातळीकडे जात असताना शहर तसेच ग्रामीण भागात पूरग्रस्तांचे स्थलांतर केले जात आहे. स्थानिक आपत्ती व्यवस्थापन समितीने गुरुवारी रबरी बोटद्वारा शेकडो आपद्ग्रस्तांना सुरक्षित स्थळी हलविले आहे. शहरात पंचगंगा नदी तसेच स्थानिक ओढ्यांचे पाणी नागरी भागात घुसत आहे. यामुळे काही भागांना बेटाचे स्वरूप प्राप्त झाले आहे. त्यांचा संपर्क तुटला आहे. अनेक घरात पाणी घुसले आहे. त्यांना सुरक्षित स्थळी निघण्याच्या सूचना कोल्हापूर महापालिका प्रशासनाने केल्या आहेत. पुराचा धोका वाढू नये यासाठी या लोकांनी सुरक्षितस्थळी स्थलांतर करावे असे प्रयत्न सुरू आहेत.
भुकेल्या बाळाला दूध आणायला उतरली आणि ट्रेन सुटली; पण तेवढ्यात घडला चमत्कार, VIDEO चा शेवट पाहून डोळ्यांत येईल पाणी
