Kunal kamra row: मुंबईत तोडफोड करणारा शिंदे गटाचा नेता कोण? ठाकरेंच्या शिवसेनेशी होते संबंध…

कोण आहे कुणाल कामरा?
३९ वर्षीय राहुल कनाल हा मुंबईतील बांद्रा इथे राहतो. तो २०१० पासून शिवसेनेच्या (उबाठा) युवा शाखेचे नेते आदित्य ठाकरे यांचा निकटवर्तीय होता. युवा सेनेचा कार्यकर्ता म्हणून राहुलने त्याच्या कारकि‍र्दीची सुरुवात केली. त्यानंतर त्याची मुंबईतला युवासेनेचा पहिला जिल्हाध्यक्ष म्हणून नियुक्ती करण्यात आली. २०२३ मध्ये राहुलने युवासेनाप्रमुख आदित्य ठाकरे यांच्या कारभारावर नाराजी व्यक्त करत सेनेचा निरोप घेतला आणि शिंदेंच्या शिवसेनेत प्रवेश केला. तेव्हापासून तो शिंदे गटाच्या युवा सेनेचा सरचिटणीस म्हणून काम करतो.

फिल्म इंडस्ट्रीतही नावाजलेला राहुल
वांद्र्यातील एका हॉटेलचा मालक असलेला राहुल याच्या मुंबईत सिनेमा आणि मनोरंजन क्षेत्रातही बऱ्याच ओळखी आहेत. अनेक खेळाडू आणि सेलिब्रिटींशी त्याचे जवळचे संबंध आहे. मुंबईत अनेकदा तो सलमान खानसोबत अन्नवाटप करतानाही दिसला आहे. राहुलचा जन्म मुंबईतलाच. ‘आय लव्ह मुंबई’ यासारख्या काही स्वयंसेवी संस्था तो चालवतो आणि अनेक कॉर्पोरेट सोशल रिस्पॉन्सिबिलिटीच्या कार्यक्रमांमध्ये त्याचा मोठा सहभाग असतो. राहुल हा शिर्डीतील साईबाबा संस्थान ट्र्स्टचा विश्वस्तदेखील होता. २०१७ मध्ये मुंबई महानगरपालिकेच्या शिक्षण समितीचा तो सदस्यही होता. २०२२ मध्ये राहुलच्या मुंबईतील आस्थापनांवर आयकर विभागाने छापा टाकला होता. शिवसेना नेते यशवंत जाधव यांचा सहभाग असलेल्या कथित हवाला रॅकेटमध्ये त्याचा सहभाग असल्याप्रकरणी हा छापा टाकण्यात आला होता.

नितेश राणेंसोबतही वाद
दिवंगत अभिनेता सुशातसिंग राजपूत आणि दिशा सालियन यांच्या मृत्यू प्रकरणातही राहुल याचा सहभाग असल्याचा आरोप झाला होता. भाजपाचे आमदार नितेश राणे यांनी ट्विट करत राहुलवर हा आरोप केला होता. त्यानंतर राहुलने ट्विट करत सांगितले की, “सोशल मीडिया हे एक जबाबदार व्यासपीठ आहे, मी कोणाच्याही बेजबाबदार छळापुढे झुकणार नाही. राणेंनी केलेल्या बेताल आरोपांवरून मी त्यांना मानहानीची नोटीस बजावणार आहे”, असे राहुल याने त्यावेळी म्हटले होते.

दरम्यान, सोमवारी मुंबई पोलिसांनी राहुल याच्यासह अनेक शिवसेनेच्या कार्यकर्त्यांना अटक केली आहे. त्यांच्यावर युनिकॉन्टिनेन्टल हॉटेलधील द हॅबिटॅट या क्लबची तोडफोड केल्याचा आरोप आहे.