बिहार: जेडीयुच्या भूमिकेनंतर आरजेडीला आली जाग, तेजस्वी यादव यांनी केली अग्निपथ योजना मागे घेण्याची मागणी

बिहार विधानसभेत एकूण २४३ सदस्य आहेत. आरजेडी हा बिहारमधील सर्वात मोठा पक्ष असून त्यांचे ७६ आमदार आहेत. आरजेडी आणि त्यांच्या समर्थक आमदारांची मिळून एकूण संख्या ११० आहे. भाजपा आणि जेडीयु यांची युती आहे. बहुमत मिळवण्यासाठी आरजेडीला १० जागा कमी पडल्या होत्या. जेडीयु भाजपासोबत असूनही त्यांनी अग्निपथ योजनेला ठाम विरोध केला. जेडीयुच्या या भूमिकेमुळे प्रमुख विरोधी पक्ष असणाऱ्या आरजेडीला या वादात उडी घ्यावी लागली आणि अग्निपथ योजना मागे घेण्याची मागणी करावी लागली. बिहारमधील भाजपाच्या मित्र पक्षाने आरजेडीला ही जाणीव करून दिली आणि त्यानंतर बिहारमध्ये विरोधाची धग वाढली.

तेजस्वी यादव यांनी पत्रकार परिषद घेत अग्निपथ योजना हा आरएसएसचा छुपा अजेंडा असल्याचा आरोप केला आहे. त्यांनी भाजला या योजनेबाबत २० प्रश्न विचारले आहेत. तरुण मतदार हा भाजपाच्या केंद्रस्थानी आहे. असं असूनही भाजपा बेरोजगार तरुणांबाबत निर्णय का घेत नाही? असा सवाल त्यांनी उपस्थित केला आहे. तेजस्वी यादव म्हणाले की ” दरवर्षी सुमारे पन्नास हजार  सैनिक निवृत्त होतात. म्हणजे गेल्या तीन वर्षात सुमारे दीड लाख सैनिक निवृत्त झाले. मात्र त्या रिक्त जागा अजूनही भरल्या गेल्या नाहीत. बेरीजगरीच्या संकटामुळे  देशातील सुमारे सत्तर टक्के तरुण तणावाखाली आहेत”. 

नितीश कुमार हे भाजपासोबत असूनही गेल्या काही दिवसांत त्यांनी अनेकवेळा भाजपाच्या भूमिकेला विरोध केला आहे. यामध्ये प्रामुख्याने लोकसंख्या नियंत्रण कायद्याला केलेल्या विरोधाचा उल्लेख केला जाऊ शकतो. अग्निपथ योजनेबाबत आरजेडीने कुठलीही भूमीका घेतली नव्हती. मात्र सत्तेतील भाजपाचा मित्र असणाऱ्या जेडीयुने विरोध केल्यानंतर विरोधी पक्षाला याबाबत भूमिका घेण्यास भाग पडले.