एकनाथ शिंदे यांच्या कार्यक्षेत्रात भाजप आक्रमक

एकनाथ शिंदे यांचा बालेकिल्ला असलेल्या ठाणे जिल्ह्यात भाजपने गणेश नाईक यांना मंत्रीमंडळात संधी देताच शिंदे यांच्या गोटात सावध प्रतिक्रिया उमटल्या होत्या. गणेश नाईक यांनी ठाणे आणि पालघर या एकत्रीत जिल्ह्याचे दहा वर्षांहून अधिक काळ पालकमंत्री पद भूषविले आहे. त्यामुळे त्यांना या संपूर्ण पट्टयाची खडानखडा माहीती आहे. आगरी समाजाची पार्श्वभूमी असलेल्या नाईक यांना ठाणे आणि पालघर या दोन्ही जिल्ह्यात मानणारा एक मोठा वर्ग आहे. एकनाथ शिंदे यांच्याकडे मुख्यमंत्री पद असताना नवी मुंबईत ठाण्यावरुन होणाऱ्या वाढत्या हस्तक्षेपाविषयी नाईक यांनी जाहीरपणे नाराजी व्यक्त केली होती. नवी मुंबई महापालिकेच्या स्थापनेपासून नाईक यांची येथे सत्ता राहीली आहे. प्रशासकीय राजवटीत या महापालिकेवर ठाण्याच्या वाढत्या प्रभावामुळे नाईक नाराज असल्याचे पहायला मिळाले.

‘नवी मुंबईचे कारभारी ठरविणारे तुम्ही कोण’ या शब्दात नाईक यांनी नगरविकास विभागाच्या कारभारावरच प्रश्नचिन्ह उपस्थित केले होते. त्यामुळे नाईकांना मंत्रीमंडळात स्थान देताच शिंदेसेनेचे नेते सावध झाल्याचे चित्र होते. एकनाथ शिंदे यांच्या कोपरी-पाचपाखाडी या मतदारसंघात आयोजित केलेल्या एका कार्यक्रमात नाईक यांनी ‘ठाण्यात फक्त कमळ’ अशी घोषणा करत शिंदेसेनेची अस्वस्थता आणखी वाढवली. याच कार्यक्रमात ठाण्यात जनता दरबार घेणार अशी घोषणाही नाईक यांनी केली. या घडामोडी सुरु असताना नाईक यांच्या ऐरोली या विधानसभा मतदारसंघात पक्ष प्रवेशाच्या एका जाहीर मेळाव्यात शिंदे यांनीही आपण ‘दरबारी’ राजकारण करत नाही असा टोला नाईक यांना लगाविला होता. या दोन नेत्यांमधील हा छुपा संघर्ष चर्चेत असताना मंगळवारी सायंकाळी शरद पवार यांच्या पक्षात गेलेल्या २७ माजी नगरसेवकांना नाईक यांच्या आग्रहास्तव पक्षात पुन्हा प्रवेश देऊन भाजपने आगामी महापालिका निवडणुकांसाठी पक्ष सज्ज असल्याचा संदेश दिल्याची चर्चा आता रंगली आहे.

कथोरे, नाईकांचे आक्रमक राजकारण

ठाणे जिल्ह्याच्या शहरी भागात गणेश नाईक यांनी भाजपच्या माध्यमातून आक्रमक राजकारण सुरु केले असताना ग्रामीण भागात किसन कथोरे यांच्या माध्यमातून शिंदेसेनेच्या नेत्यांना अंगावर घेण्याची रणनिती भाजपने आखली असल्याचे दिसू लागले आहे. कुळगाव-बदलापूरात भाजपची एकहाती सत्ता आणू असा आवाज कथोरे यांनी शिंदेसेनेच्या स्थानिक नेत्यांना दिला. यावरुन या दोन्ही पक्षात कलगीतुरा रंगला असतानाच मंगळवारी मुख्यमंत्री देवेंद्र फडणवीस कथोरे यांनी आयोजित केलेल्या एका कार्यक्रमासाठी बदलापूरात पोहचले. ‘तुम्ही मंत्री नसलात तरी तुमच्या मागे मुख्यमंत्री उभा आहे’ अशा शब्दात फडणवीस यांनी कथोरे यांचे बळ वाढविले. कथोरे आणि शिंदेसेनेत स्थानिक पातळीवर विळ्या भोपळ्याचे नाते आहे. नवी मुंबईतही नाईक आणि शिंदेसेनेचे जमत नाही. नाईक यांच्या विरोधात अपक्ष निवडणूक लढविणारे विजय चौगुले यांना शिंदेसेनेची उघड साथ होती. या चौगुले यांना उपनेते पदी बढती देण्याचा निर्णय नुकताच शिंदे यांनी घेतला. ही घडामोड ताजी असताना २७ माजी नगरसेवकांना पुन्हा पक्षात घेताना भाजपने नाईक यांच्यामागे पक्ष उभा असल्याचा संदेश दिला आहे. विशेष म्हणजे, बेलापूरच्या आमदार मंदा म्हात्रे यांच्या विरोधास वाटाण्याच्या अक्षता दाखवित महापालिका निवडणुकांचे नेतृत्व नाईक यांच्याकडेच राहील अशापद्धतीची आखणीही करण्यात आल्याचे समजते.

भाजपमध्ये प्रवेश मिळावा अशी विनंती आम्ही वनमंत्री गणेश नाईक यांना केली होती. आमची ही विनंती भाजप श्रेष्ठींनी मान्य केली त्याबद्दल आम्ही आभारी आहोत. गणेश नाईक यांच्या माध्यमातून भाजप संघटना वाढीसाठी आम्ही यापुढेही काम करत राहू असा विश्वास आम्ही नेते मंडळींना दिला आहे. – संपत शेवाळे, माजी नगरसेवक भाजप