चावडी: आता शांत झोप लागणार का?

हर्षवर्धन पाटील हे १९९५ पासून येनकेनप्रकारेण राजकीय वर्तुळात चर्चेत राहिले आहेत. अपक्ष म्हणून निवडून आलेल्या पाटील यांचा युती सरकारमध्ये समावेश झाला होता. १९९९ मध्ये सत्ताबदल होताच अपक्ष निवडून आलेल्या पाटील यांचा लोकशाही आघाडी सरकारमध्ये समावेश झाला. पण मंत्रिमंडळाचा आकार फारच मोठा आहे या कारणावरून सहा मंत्र्यांना नारळ देण्यात आला. त्यात हर्षवर्धन पाटील हेसुद्धा होते. पुढे तत्कालीन मुख्यमंत्री विलासराव देशमुख यांच्याशी त्यांनी चांगले जमविले. सहकार, संसदीय कार्य, पणनसारखी महत्त्वाची खाती त्यांच्या वाट्याला आली. २०१४ मध्ये ते इंदापूरमधून पराभूत झाले आणि त्यांच्या नशिबी राजकीय विजनवास आला. २०१९ मध्ये राष्ट्रवादीने इंदापूरची जागा पाटील यांना सोडण्यास नकार दिला आणि पाटील यांनी भाजपमध्ये प्रवेश केला. विधानसभा निवडणुकीत त्यांचा पुन्हा पराभव झाला. याच काळात ईडी व अन्य शासकीय यंत्रणा अधिकच सक्रिय झाल्या होत्या. काँग्रेस, राष्ट्रवादीच्या नेत्यांना दरदरून घाम फुटला होता. तेव्हा ‘भाजपमध्ये प्रवेश केल्याने शांत झोप लागते’, असे वक्तव्य हर्षवर्धन पाटील यांनी केल्याने त्याची प्रतिक्रिया उमटली. भाजप नेत्यांनाही हे विधान फारसे रुचले नव्हते. राज्यसभा किंवा विधान परिषदेवर वर्णी लावून आपले पुनर्वसन करण्याची पाटील यांची मागणी भाजपने काही पूर्ण केली नाही. अजित पवार महायुतीबरोबर आल्याने इंदापूर मतदारसंघात लढण्याची संधी मिळणे कठीण होते. शेवटी हर्षवर्धन पाटील यांनी तुतारी हाती घेतली. २०१९ मध्ये शरद पवार यांच्या आक्रमक प्रचारामुळे पराभव झाल्याची भावना पाटील यांनी तेव्हा व्यक्त केली होती. आता शरद पवार हेच मदतीला येतील, असा विश्वास पाटील यांना वाटतो. भाजपला रामराम केल्यावर ईडी वगैरे यंत्रणा मागे लागतात हे एकनाथ खडसे यांनी अनुभवले आहे. यामुळेच हर्षवर्धन पाटील यांना झोपमोड होणार नाही याची खबरदारी घ्यावी लागणार आहे.