जेजेपी पार्टी राजस्थानमध्ये २५ ते ३० जागा लढवणार; ७ जिल्ह्यांवर विशेष लक्ष!

जेजेपी पक्ष २५ ते ३० जागा लढवणार

जेजेपी पक्षाकडून दुष्यंत चौटाला शेतकरी नेते असल्याची प्रतिमा रुजवण्याचा प्रयत्न केला जात आहे. हा पक्ष २०० पैकी २५ ते ३० जागा लढवणार आहे. अद्याप या पक्षाने आपल्या उमेदवारांची घोषणा केलेली नाही. मात्र चौटाला यांनी १९ आणि २० ऑक्टोबर रोजी कोटपुतली, जयपूर आणि भरतपूर मतदारसंघातील ५० हून अधिक गावांमध्ये रोड शो केले. जेजेपी पक्षाकडून ग्रामीण भागातील मतदारांना आकर्षित करण्याचा प्रयत्न केला जात आहे.

हेही वाचा – कर्नाटक काँग्रेसमध्ये घराणेशाही; मुलांना लोकसभेचे तिकीट मिळण्यासाठी दोन मंत्र्यांमध्ये संघर्ष

जेजेपी पक्षाने सात जिल्ह्यांवर लक्ष केले केंद्रित

राजस्थानमध्ये साधारण ७५ टक्के लोक हे ग्रामीण भागात राहतात. याच मतदारांवर जेजेपी पक्षाकडून प्रयत्न केला जात आहे. हा पक्ष मुख्यत्वे हनुमानगड, झुंझुनू, छुरू, सिकर, जयपूर, अलवर आणि भरतपूर या हरियाणा राज्याला लागून असलेल्या सात जिल्ह्यांवर लक्ष केंद्रित करत आहे. या सात जिल्ह्यांत विधानसभेचे एकूण ६२ मतदारसंघ आहेत. २०१८ सालाच्या निवडणुकीत काँग्रेसने २८, तर भाजपाने २१ जागा जिंकल्या होत्या.

आम्ही पूर्ण ताकदीने निवडणूक लढवणार

जेजेपीने अद्याप आपल्या उमेदवारांची घोषणा केलेली नाही. आपल्या उमेदवारांबद्दल दुष्यंत चौटाला यांनी प्रतिक्रिया दिली आहे. “जेजेपी पक्ष हा राजस्थानमध्ये विधानसभा निवडणूक पहिल्यांदाच लढत आहे. या पहिल्याच निवडणुकीत आम्ही पूर्ण ताकदीने लढणार आहोत. साधारण २५-३० जागांवर आम्ही निवडणूक लढवणार आहोत,” असे चौटाला म्हणाले.

हेही वाचा – राजकीय स्वार्थासाठी देशात अनिष्ठ शक्तींसोबत आघाडी, सरसंघचालकांची विरोधी पक्षांच्या आघाडीवर टीका

हरियाणात राबवलेल्या योजनांचा राजस्थानमध्ये उल्लेख

राजस्थानच्या प्रचारामध्ये जेजेपी हा पक्ष गरीब, शेतकरी, कामगारवर्गाचा पक्ष असल्याची प्रतिमा निर्माण केली जात आहे. या पक्षाकडून हरियाणामध्ये लागू केलेल्या योजना आणि घेतलेले निर्णय हे राजस्थानच्या जनतेला सांगितले जात आहेत. हरियाणामध्ये पंचायती राजच्या निवडणुकीत महिलांना आरक्षण, खासगी क्षेत्रात नोकऱ्यांत आरक्षण, किमान आधारभूत किमतीवर पिकांची खरेदी, नुकसानभरपाई थेट शेतकऱ्यांच्या बँक खात्यात पाठवणे आदी निर्णय सत्तेत सहभागी असलेल्या या पक्षाने घेतलेले आहेत. जेजेपी पक्षाकडून याच निर्णयांचा उल्लेख राजस्थानमध्ये प्रचार करताना केला जात आहे.

धोरण ठरवताना कामगार, गरीब शेतकऱ्यांना विचारात घेतले जाईल

राजस्थानमध्ये आपल्या सभेमध्ये दुष्यंत चौटाला जनतेला अनेक आश्वासने देत आहेत. यामध्ये किमान आधारभूत किमतीवर बाजरी विकत घेऊ, शेतकऱ्यांना मिळणारी मदत थेट बँक खात्यात जमा केली जाईल, अशी आश्वासने दिली जात आहेत. राजस्थानमध्ये धोरण ठरवताना कामगार, गरीब आणि शेतकऱ्यांना विचारात घेतले जाईल, असेही चौटाला राजस्थानच्या जनतेला सांगत आहेत.