सूर्यकांता पाटील यांच्यापाठोपाठ माधव किन्हाळकर यांचाही भाजपाला रामराम

डॉ.किन्हाळकर १९९० ते ९९ दरम्यान काँग्रेस पक्षाचे भोकरचे आमदार होते. आमदारकीच्या पहिल्याच कार्यकाळात त्यांना राज्यमंत्रिपदाची संधी मिळाली. राष्ट्रवादी काँग्रेसची स्थापना झाल्यानंतर ते या पक्षात गेले; पण नंतर त्यांना विधानसभेवर निवडून येता आले नाही. २००९ साली मुख्यमंत्री असलेल्या अशोक चव्हाण यांच्याविरुद्ध भोकरमधून लढण्याचे धाडस त्यांनी दाखविले. पराभव झाला, तरी नंतर चव्हाण यांच्या विरोधात निवडणूक आयोगासमोर त्यांनी पुकारलेली कायदेशीर लढाई देशभर गाजली होती.

हेही वाचा…भाजपचे सुधाकर भालेराव यांचा राष्ट्रवादी शरद पवार गटात प्रवेश निश्चित

डॉ.किन्हाळकर यांनी २०१४ साली भाजपात प्रवेश केला. या पक्षातर्फे लोकसभा निवडणूक लढविण्याची त्यांची इच्छा होती. पण पक्षनेतृत्वाने मागील काही वर्षांत त्यांना बेदखल केले होते. चार महिन्यांपूर्वी काँग्रेस पक्षाने किन्हाळकर यांना नांदेडमधून लोकसभेची निवडणूक लढविण्याचा प्रस्ताव दिला होता. पण तेव्हा त्यांना राजकीय निर्णय करता आला नाही. आता भाजपाला सोडचिठ्ठी दिल्यानंतर पुढील राजकीय निर्णय लवकरच घेणार असल्याचे त्यांनी मंगळवारी येथे स्पष्ट केले.