ओळख नवीन खासदारांची : डॉ. हेमंत सावरा (पालघर – भाजप) ; वडिलांची पुण्याई

वडिलांची पुण्याई कामाला आली. २०१९ मध्ये वडिलांची प्रकृती खालावल्याने डॉ. हेमंत सवरा यांना विक्रमगड विधानसभेची उमेदवारी देण्यात आली, मात्र सुमारे २१ हजार मतांनी त्यांचा पराभव झाला. या पराभवातून तसेच सन २०२० मध्ये वडिलांच्या निधनानंतर न डगमगता डॉ. सावरा यांनी आपला राजकीय व सामाजिक प्रवास सुरूच ठेवला. पक्षाच्या अनेक उपक्रमांत त्यांनी हिरिरीने भाग घेतला. कार्यकर्त्यांचा लोकसंपर्क कायम ठेवत मृदभाषी डॉ. सावरा यांनी स्थानिक प्रश्न सोडवण्यासाठी प्रयत्न केले. वाडा नगरपंचायतीच्या निवडणुकीत थेट नगराध्यक्ष पदासाठी डॉ. हेमंत सावरा यांची बहीण निशा सावरा या निवडणुकीच्या रिंगणात होत्या. त्यावेळी प्रचार व निवडणूक व्यवस्थापनाची धुरा त्यांनी सांभाळली होती.

हेही वाचा – सरपंच ते ओडिशाचे पहिले भाजपा मुख्यमंत्री; कोण आहेत मोहन चरण माझी?

हेही वाचा – राजाभाऊ वाजे (नाशिक, शिवसेना ठाकरे गट) : साधेपणा हाच चेहरा

मुंबई येथील सर जे.जे रुग्णालयाअंतर्गत असणाऱ्या ग्रँड मेडिकल महाविद्यालयात त्यांनी एमबीबीएस ही पदवी सन २००० मध्ये व ऑर्थोपेडिक विभागात पदव्युत्तर शिक्षण सन २००४ मध्ये पूर्ण केले. पालघर तालुक्यातील तलवाडा येथे वैद्यकीय अधिकारी म्हणून दीड वर्ष काम केल्यानंतर मुंबईतील नायर रुग्णालय व नंतर कळवा येथील छत्रपती शिवाजी महाराज रुग्णालयात निबंधक (रजिस्ट्रार) म्हणून दोन्ही ठिकाणी प्रत्येकी दोन वर्ष काम केले. हडाणू, पालघर हा एकेकाळी भाजपचा बालेकिल्ला होता. पण नंतर भाजपचे वर्चस्व कमी होत गेले. डॉ. सावरा यांच्यामुळे भाजपला पालघर जिल्ह्यात नवे नेतृत्व मिळाले आहे.