कोल्हापुरात शिंदे गट – भाजप मधील तणाव वाढीस

कोल्हापूर मतदार संघात आधीच्या दोन लढती या संजय मंडलिक – धनंजय महाडिक यांच्यात प्रत्येकी एक विजय एक पराभव अशा बरोबरीत सुटल्या आहेत. यावेळी या आखाड्यात महायुतीकडून उतरण्याची तयारी दोघांनीही केली आहे. संजय मंडलिक यांच्या उमेदवारीला भाजपमधून विरोध लपून राहिलेला नाही. अलीकडेच मध्य प्रदेशचे माजी मुख्यमंत्री शिवराजसिंह चौहान यांच्या दौऱ्यावेळी तशी मागणी उघडपणे करण्यात आली.

आणखी वाचा

कल्याण पूर्व शिवसेना शहरप्रमुखपदी नीलेश शिंदे यांची नियुक्ती

‘हिंदुत्व तोडणारा राक्षस’, कालीचरण यांच्या विधानानंतर मनोज जरांगे…

ऐरोलीतील बंडखोरांना शिंदे गटाचे अभय? बेलापुरात कारवाई, ऐरोलीत आस्ते कदम

“विरोधकांनी योजनांसह वचननामाही चोरला…”, मुख्यमंत्री एकनाथ शिंदेंची अंबरनाथमध्ये टीका

शिवसेना (शिंदे) पक्षातील सात जणांची हकालपट्टी

लक्षवेधी लढत : धार्मिक ध्रुवीकरणाचा प्रयोग यशस्वी होणार?

सुलभा गायकवाडांच्या प्रचारासाठी अखेर खासदार शिंदे मैदानात

दखल: बायजाबाई यांच्या कर्तृत्वाचा आढावा

हेही वाचा : पक्षाअंतर्गत विरोधकांशी संवाद साधण्याची विखे-पाटील यांना गरज का भासली ?

भाजपाची प्रबळ दावेदारी

वर्षभरापूर्वी राज्यसभा निवडणुकीत धनंजय महाडिक यांनी विजय मिळवला असला तरी त्यांना लोकसभेचे वेध लागले असून पक्षाने संधी दिली तर निवडणूक लढवू असे म्हणत आहेत. शिवाय, अरुंधती धनंजय महाडिक, शौमिका अमल महाडिक ही नावे त्यांच्याकडून पुढे आणली जात आहेत. स्पर्धेत भाजपचे ग्रामीण जिल्हाध्यक्ष समरजितसिंह घाटगे यांचेही नाव असले तरी त्यांचा जीव कागल विधानसभा मतदारसंघात गुंतला आहे. या पद्धतीने भाजपचा आडून आडून असेना वेळोवेळी दावा सुरु राहिला.

हेही वाचा : नाशिकमध्ये भाजप-राष्ट्रवादीकडून शिंदे गटाची कोंडी

मंडलिकांना भाजपचा शह

संजय मंडलिक हे आपणच उमेदवार असणार हे छातीठोकपणे सांगात आहेत. शाहू महाराज यांच्या विरोधात लढण्याचे गृहीत धरून त्यांनी प्रचाराला सुरुवात केली आहे. इकडे जिल्ह्याच्या दक्षिणेकडील भागात वेगळाच राजकीय रंग भरला जात आहे. राष्ट्रवादी काँग्रेसचे दिवंगत नेते, विधानसभेचे अध्यक्ष बाबा कुपेकर यांचे पुतणे संग्रामसिंह कुपेकर यांनी विधानसभेची उमेदवारी न मिळाल्याने आधी शिवसेना आणि वर्षभरापूर्वी भाजपमध्ये प्रवेश केला. गडहिंग्लज तालुक्यातील भाजपच्या मेळाव्यात कुपेकर यांनी मंडलिक यांचे वाभाडे काढले. संजय मंडलिक यांचा मतदारसंघात संपर्क नाही. उद्या वेगळे चित्र दिसले तर त्याचे खापर भाजपच्या डोक्यावर फोडले जाईल. मागील वेळी धनंजय महाडिक यांचा प्रचार केला नाही ही मोठी चूक झाली. मंडलिक यांना उमेदवारी दिली तर प्रचार करणार नाही. लोकांना कितीही सांगितले तरी ते मते देणार नाहीत. भाजपच्या चिन्हावर लढणारा दुसरा कोणताही उमेदवार द्यावा, असे टोकाचे विधान कुपेकर यांनी केल्याने महायुतीतील वाद उफाळला आहे.

हेही वाचा : साताऱ्यातून आजी-माजी सैनिक, माथाडी कामगारांचे नेतेही इच्छुक

मंडलिक संघर्षाच्या तयारीत

कुपेकर हे महाडिक यांचे नातेवाईक आहेत. त्यामुळे मंडलिक यांच्या छावणीतून या विधानाचे कर्तेकरविते कोण याची संगती लावली जात आहे. या विधानावरून महायुती मधील तणाव वाढीस लागला असून त्याचे पडसाद ‘वर्षा’ पर्यंत गेल्याचे सांगण्यात येते. ठिणगीची ज्वाळा होण्यापूर्वीच नेते सावध झाले आहेत. लगेचच खासदार धनंजय महाडिक यांना महायुतीच्या कोणत्याही नेत्यांनी वादग्रस्त विधाने करू नयेत. मतदारसंघ शिवसेनेकडे जाणार आहे. भाजपचा या मतदारसंघावर दावा नाही, अशी मखलाशी करावी लागत आहे. टीका जिव्हारी लागल्याने मंडलिक यांनी कुपेकर यांच्यावर पलटवार केला आहे. मित्र असलेले संग्रामसिंह कुपेकर नेहमी भेटतात. पण विकास कामाबद्दल त्यांनी कधीच वाच्यता केलेली नाही. त्यांच्या शेतातील रस्ता मीच केला आहे. माझ्या विकास कामांची माहिती घेतली असती तर त्यांचे गैरसमज दूर झाले असते, असा टोला लगावला आहे. उमेदवारीबाबत अनिश्चितता असली तरी मंडलिक हे काही झाले तरी निवडणूक लढवणार हे नक्की. उमेदवारीवरून दावे – प्रतिदावे, टीकाटिपणी सुरु असली तरी निवडणुकीच्या तोंडावर कोल्हापुरातील महायुतीतील तणाव निकालावर परिणाम करणारा ठरू शकतो याचे भान उरले नसल्याचे दिसत आहे.