इंडिया आघाडीत नितीश कुमार यांना महत्त्वाची जबाबदारी मिळणार? मल्लिकार्जुन खरगे अध्यक्षपदी?

नितीश कुमार आघाडीच्या निमंत्रकपदी?

नितीश कुमार यांची इंडिया आघाडीच्या निमंत्रकपदी तर काँग्रेसचे राष्ट्रीय अध्यक्ष मल्लिकार्जुन खरगे यांची आघाडीच्या अध्यक्षपदी नियुक्ती केली जाण्याची शक्यता आहे. संयुक्त जनता दल, काँग्रेस, राष्ट्रीय जनता दल (राजद) तसेच काही डाव्या पक्षातील सूत्रांच्या माहितीनुसार नितीश कुमार यांना निमंत्रकपद देण्याची काँग्रेसची तयारी आहे. नितीश कुमार यांना खूश ठेवण्यासाठी हा निर्णय घेतला जाऊ शकतो, असे सांगितले जात आहे. “काँग्रेसचे माजी अध्यक्ष राहुल गांधी हे भारत न्याय यात्रेवर असणार आहेत. अशा काळात नितीश कुमार हे भाजपाच्या नेतृत्वाखालील एनडीए आघाडीत गेल्यास इंडिया आघाडीतील सर्व पक्ष एकत्र राहणार नाहीत. इंडिया आघाडीतील बहुतांश पक्षांनी हीच चिंता व्यक्त केलेली आहे. नितीश कुमार यांना निमंत्रकपद देण्याची तयारी झालेली असली तरी या आघाडीत काँग्रेस हाच प्रमुख पक्ष राहणार आहे. कारण या आघाडीच्या अध्यक्षपदी खरगे यांची नियुक्ती केली जाऊ शकते,” असे काँग्रेसच्या एका नेत्याने सांगितले.