विधानसभा निवडणुकीच्या पार्श्वभूमीवर कर्नाटकमध्ये राजकीय घडामोडींना वेग आला आहे. तिकीट नाकारल्यामुळे येथे भाजपाच्या अनेक महत्त्वाच्या नेत्यांनी काँग्रेसमध्ये प्रवेश केला आहे. याच कारणामुळे भाजपाची डोकेदुखी वाढली आहे. नुकतेच जगदीश शेट्टर आणि लक्ष्मण सावदी या बड्या नेत्यांनीही भाजपाला रामराम ठोकत काँग्रेसमध्ये जाहीर प्रवेश केला आहे. परिणामी लिंगायत समाज दूर जाण्याची भाजपाला भीती वाटत आहे. हा फटका बसू नये म्हणून भाजपाच्या लिंगायत समाजाच्या नेत्यांची बधवारी बैठक पार पडली. या बैठकीत अनेक महत्त्वाच्या विषयांवर चर्चा झाली आहे.
निवडणुकीपूर्वीच मुख्यमंत्रिपदासाठीचा उमेदवार घोषित करा
लिंगायत समाजाला आकर्षित करण्यासाठी काय करावे? यावर भाजपा नेत्यांची बुधवारच्या बैठकीत चर्चा झाली. या बैठकीला कर्नाटकचे माजी मुख्यमंत्री तथा भाजपाचे ज्येष्ठ नेते बीएस येडियुरप्पा, मुख्यमंत्री तथा भाजपाचे नेते बसवराज बोम्मई यांच्यासह लिंगायत समाजाचे अन्य महत्त्वाचे नेते उपस्थित होते. लिंगायत समाजाची मतं फुटू नयेत यासाठी निवडणुकीपूर्वीच मुख्यमंत्रिपदासाठीचा उमेदवार म्हणून एखाद्या लिंगायत समाजाच्या नेत्याची घोषणा करावी, असे मत यावेळी मांडण्यात आले.
हेही वाचा >> Karnataka Election : “मी पळून जाणारा मुख्यमंत्री नाही,” बसवराज बोम्मई यांचे सिद्धरामय्या यांच्यावर टीकास्र
लिंगायत समाजाची मतं फुटू नयेत यासाठी भाजपाकडून प्रयत्न
याविषयी बोम्मई यांनी अधिक माहिती दिली आहे. “सध्याच्या राजकीय परिस्थितीवर चर्जा करण्यासाठी आम्ही ही बैठक बोलावली होती. भाजपा लिंगायत समाजाच्या विरोधात आहे, असा चुकीचा प्रचार काँग्रेसकडून केला जात आहे. यावरही या बैठकीत चर्चा झाली. काँग्रेसच्या या रणनीतीला कसे उत्तर द्यावे, यावरही चर्चा झाली. भाजपाने निवडणुकीच्या अगोदरच लिंगायत समाजातील नेत्याची मुख्यमंत्रिपदाचा उमेदवार म्हणून घोषणा करावी, असे काही नेत्यांचे मत आहे. पक्षाचे केंद्रीय निरीक्षक धर्मेंद्र प्रधान हेदेखील या चर्चेचा भाग होते. आमची मतं ते दिल्लीला कळवणार आहेत,” असे बोम्मई म्हणाले.
काँग्रेसकडून लिंगायत समाजावर अन्याय, भाजपाचा दावा
काँग्रेसने लिंगायत समाजावर कसा अन्याय केलेला आहे, हे आम्ही समोर आनणार आहोत, असेही बोम्मई यांनी सांगितले. “१९६७ सालापासून मागील साधारण ५० वर्षांत काँग्रेसने विरेंद्र पाटील वगळता एकाही लिंगायत समाजाच्या नेत्याला मुख्यमंत्रीपद दिलेले नाही. विरेंद्र पाटील हेदेखील फक्त आठ महिनेच मुख्यमंत्री होते. विरेंद्र पाटील यांना त्या आठ महिन्यांत वाईट वागणूक देण्यात आली. यावरूनच काँग्रेस लिंगायत समाजाला कशी वागणूक देते, हे स्पष्ट होते.” असे बोम्मई म्हणाले.
हेही वाचा >> सोलापुरातील राजकीय वातावरण पुन्हा तापू लागले; विमानसेवा आणि चिमणी दोन्ही मुद्दे वादग्रस्त
भाजपात सर्व समाजाचा आदर केला जातो- बोम्मई
भाजपामध्ये सर्वच जाती-धर्मांचा आदर केला जातो, असा दावा बोम्मई यांनी केला. “भाजपामध्ये सर्वच समुदायांना सन्मान मिळतो. काँग्रेसमध्ये मात्र हे शक्य नाही. त्यांनी दलित, लिंगायत, मागासवर्गीयांची फसवणूक केलेली आहे,” असे बोम्मई म्हणाले.
प्रचारात मोदी सहभागी होणार
उमेदवारी अर्ज मागे घेण्याची शेवटची तारीख २४ एप्रिल आहे. त्यानंतर भाजापकडून प्रचाराला सुरुवात केली जाणार आहे. या मोहिमेत पंतप्रधान नरेंद्र मोदीदेखील सहभागी होणार आहेत. मोदींच्या कर्नाटकमध्ये बैठका, सभा, रोडशो आयोजित केले जातील, अशी माहिती बोम्मई यांनी दिली. २७ एप्रिलपासून मोदी कर्नाटकमधील प्रचारात सहभागी होणार आहेत.
