नागपूर : लोकसभा निवडणुकीत केंद्रीय मंत्री नितीन गडकरी यांना कडवे आव्हान देणारे विकास ठाकरे यांना काँग्रेसने पुन्हा एकदा पश्चिम नागपूर मतदारसंघाच्या मैदानात उतरले असून त्यांना टक्कर देण्यासाठी भाजपने सुधाकर कोहळे यांना उमेदवारी दिली आहे. काँग्रेस बंडखोरही रिंगणात असल्याने काँग्रेसपुढे हा मतदारसंघ राखण्याचे आव्हान आहे.
विकास ठाकरे यांनी गेल्या पाच वर्षांत केलेली कामे आणि लोकप्रतिनिधी म्हणून असलेली प्रश्नांची जाण ही त्यांची सकारात्मक बाजू ठरत आहे. शिवाय त्यांचा जनसंपर्कात सातत्य आहे. त्याचा त्यांना लाभ होताना दिसत आहे. काँग्रेसच्या सरचिटणीस प्रियंका गांधी यांनी रविवारी पश्चिम नागपुरात रोड-शो केल्यानंतर वातावरण आणखी ठाकरेंना बाजूने तयार झाल्याचे दिसून येत आहे.
हेही वाचा >>>अकोला जिल्ह्यात तिरंगी सामने; महायुती, महाविकास आघाडीसह वंचित लढतीत
सिव्हिल लाईन्स सारखा विकसित आणि बोरगाव, दाभा, धापेवाडा सारख्या नव्याने विकसित होत असलेला भाग या मतदारसंघात आहे. तसेच फुटाळा आणि पांढराबोडी सारखा ‘स्लम एरिया’ देखील आहे. याबरोबरच येथे हिंदी भाषक आणि मुस्लीमांची संख्या निर्णायक आहे. साधारणत: हिंदी भाषक मतदारांचा भाजपकडे कल आणि मुस्लीम समाज काँग्रेसच्या बाजूने कौल देतील, असे काही निडवणुकीवरून अंदाज बांधला जात आहे. यावरून या मतदासंघात विकास ठाकरे आणि सुधाकर कोहळे यांच्यात अटीतटीची लढत होण्याची शक्यता आहे. तर अपक्ष उमेदवार नरेंद्र जिचकार यांनी अतिशय नेटाने प्रचार केला आहे. त्यामुळे काँग्रेस आणि भाजप या प्रमुख दोन पक्षाच्या थेट लढत आणखी रंगतदार झाली आहे. येथे मुस्लीम समाजाची ११ ते १२ टक्के मते असल्याचा लाभ ठाकरेंना होईल असे दिसून येत आहे.
हेही वाचा >>>लक्षवेधी लढत : काँग्रेसमधील बंडाळीचा भाजपला फायदा?
प्रियंका गांधी यांच्या रोड-शोमध्ये मोठ्या प्रमाणात मुस्लीम महिलांना रस्त्याच्या दुतर्फा उभे असल्याचे चित्र होते. तर अनुसूचित जातीचे २० ते २१ टक्के मतदार असून या मतांवर देखील ठाकरे यांची मदार आहे. हे ओळखून येथे बसपचे प्रकाश गजभिये आणि वंचित बहुजन आघाडीचे यश गौरखेडे देखील मैदानात उतरले आहे. असे असलेतरी लोकसभा निवडणुकीत मतदारांचा कौल बघता ठाकरे यांचे पारडे जड दिसून येत आहे.
