‘निष्ठावान’ अशी प्रतिमा उदयसिंह राजपूत यांना तारू शकेल ?

हर्षवर्धन जाधव आणि संजना जाधव हे विभक्त असल्याचे त्यांच्या शपथपत्राही आता नमूद करण्यात आले आहे. संजना जाधव यांना महायुतीचे उमेदवारी मिळावी यासाठी रावसाहेब दानवे प्रयत्नशील होते. शिवसेना ( एकनाथ शिंदे ) पक्षातून त्यांना प्रवेश आणि उमेदवारी एकाच दिवशी दिल्यानंतर रावसाहेब दानवे हे या मतदारसंघात प्रचार करत आहेत. एकनाथ शिंदे यांच्या सभेतही त्यांनी या मतदारसंघात आवर्जून हजेरी लावली. उदयसिंह राजपूत ओबीसी. संजना जाधव, हर्षवर्धन जाधव आणि जरांगे पाटील यांचे समर्थक म्हणून काम करणारे पण अर्ज काढून घ्या असे म्हटल्यानंतरही अपक्ष रिगणात उभे असणारे उमेदवार मनोज पवार हे तिघे मराठा उमेदवार. त्यामुळे मराठा मतांमध्ये विभागणी होईल आणि उदयसिंह राजपूत यांना लाभ मिळेल असे सरधोपट वाटणारे गणित जरांगे यांच्या भूमिकेमुळे बदलते. आरक्षण विरोधात उभे ठाकणाऱ्याला मतदान करू नका असा आदेश मानायचा ठरले तर महायुतीच्या उमेदवार संजना जाधव यांना मतदान करता येणार नाही, असे मराठा मतदार मानतात. त्यानंतर उरतात दोन पर्याय, हर्षवर्धन जाधव आणि मनोज पवार. हर्षवर्धन जाधव यांनी मराठा आरक्षण मागणीसाठी राजीनामा दिला होता. पण ते कधी काय करतील याचा नेम सांगता येत नाही, अशी मतदारांमधील भावना. मनाेज पवार यांनी त्यांना अर्ज काढून घेण्यास सांगूनही ते रिंगणात उभे. त्यामुळे त्यांना मदत करण्यावरुनही संभ्रम. उदयसिंह राजपूत यांना ओबीसी म्हणून मराठा माणसाने मतदान कसे करावे, असाही पेच. त्यामुळे जातीच्या आधारे मतदानाची सारी गणिते बिघडतात. मग विकासकामांचा निकष म्हणून मतदान होईल का, या प्रश्नावर कन्नडची मंडळी पुन्हा पेचात. जे या तालुक्यात साखर कारखाना चालवतात ते राेहीत पवार कन्नड तालुक्यात राजकारणापासून चार हात लांब.

हेही वाचा : विधानसभा निवडणुकीत चंद्रपुरात भाजपला गटबाजीचे ग्रहण

हर्षवर्धन जाधव यांच्या पत्नी विभक्त होण्यापूर्वी संजना जाधव जिल्हा परिषद निवडणुकीमध्ये ज्यांच्याकडून पराभूत झाल्या त्या केतन काजे यांना निवडून आणण्यासाठी चंद्रकांत खैरे यांनी प्रयत्न केले. म्हणून हर्षवर्धन जाधव २०१९ च्या निवडणुकीमध्ये खैरे यांच्या विरोधात उभारले. ते केतन काजे फुटीनंतर शिवसेना ( एकनाथ शिंदे ) गटाकडे गेले. त्यांना शिवसेना शिंदे गटातून काढण्यात आले आहे. त्यामागे रावसाहेब दानवे असल्याच्या भावनेतून काजे यांचा हर्षवर्धन जाधव यांना असणारा विरोध मावळला आहे. मूळ पक्षात काम करणारी मंडळी त्या- त्या पक्षात काम करत नाहीत. नवाच माणूस आणि त्याच्या जातीचे तिसरेच गणित समोर येत असल्याने नवाच पेच कन्नडच्या मतदारांसमोर आहे. त्यामुळे ‘लागेल की माझी लॉटरी, ’ असे प्रत्येक उमेदवारास वाटत आहे. ज्या ओबीसी मतांवर उदयसिंह राजपूत यांची भिस्त आहे, त्यानांही बंजारा समाजातून विरोध असल्याचे सांगण्यात येते. नागद जिल्हा परिषदेमधील रस्त्याचे काम पूर्ण न झाल्याने एका महिलाचा काही महिन्यांपूर्वी मृत्यू झाला. त्यामुळे अनेक कार्यकर्ते नाराज असणाऱ्या बंजारा समाजाचा रोष कमी करणे हे राजपूत यांच्यासमोरचे आव्हान असल्याचे सांगण्यात येते. महायुतीच्या उमेदवार संजना जाधव यांनाही भाजपचे ‘ ओबीसी ’ मतदान मिळेल असा दावा केला जातो. त्यामुळे ओबीसी मतांमध्येही फूट पडेल. या मतदारसंघात भिल्ल, ठाकर असे आदिवसी मतदानही लक्षणीय आहे. त्यामुळे त्यामुळे पेचातील मतदार आणि गुंत्यातील उमेदवार असे राजकीय पटलावरचे चित्र दिसून येत आहे.