केरळमधील कोझिकोड येथे काँग्रेसचे खासदार शशी थरुर यांचे व्याख्यान आयोजित करण्यात आलं होते. कोझिकोड युवक काँग्रेसच्या वतीनं आयोजित केलेलं व्याख्यान काही कारणास्तव रद्द करण्यात आलं. मात्र, हे रद्द करण्याचे कारण राज्य काँग्रेस आणि युवक काँग्रेसकडून देण्यात आले नाही. कोझिकोडमधील काँग्रेसमधील एका नेत्याच्या सांगण्यावरून हा कार्यक्रम रद्द केल्याचं समोर आलं आहे.
रविवारी ( २२ नोव्हेंबर ) ‘संघ परिवार आणि धर्मनिरपेक्षते पुढील आव्हाने’ या विषयावर शशी थरुर संबोधित करणार होते. पण, ऐनवेळी युवक काँग्रेसकडून हे व्याख्यान रद्द करण्यात आलं. यामागे काँग्रेसच्या वरिष्ठ नेत्याच्या सांगण्यावरून व्याख्यान रद्द करण्यात आलं, असा आरोप करण्यात येत आहे. व्याख्यान रद्द करण्यामागे कोणतेही कारण पक्षाकडून देण्यात आलं नाही. त्यानंतर हे व्याख्यान कोझिकोड येथील जवाहर युथ फाऊंडेशनतर्फे आयोजित करण्यात आलं. याला मोठ्या प्रमाणात पाठिंबाही मिळाला होता.
हेही वाचा : ‘आप’ने मुख्यमंत्र्यांना डिवचलं, भूपेंद्र पटेलांना ‘कटपुतली’ म्हणत केजरीवालांचा हल्लाबोल
व्याख्यान रद्द केल्यावरून आता राज्यातील काँग्रेसमध्ये आरोप-प्रत्यारोप सुरु झाले आहेत. केरळमधील काँग्रेसचे ज्येष्ठ नेते के मुरलीधरन यांनी म्हटलं की, “मुख्यमंत्री पदासाठी इच्छुक असणारे हे व्याख्यान रद्द करण्यामागे आहेत. यासाठी कट रचण्यात आला होता. त्यात युवक काँग्रेसच्या कोणत्याही नेत्याचा सहभाग नाही. मला कोणाचेही नाव घ्यायचे नाही. पण, थरुर यांचे व्याख्यान रद्द करायला पाहिजे नव्हते.”
“थरुर यांना युवक काँग्रेसच्या स्टेजचा वापर करण्यापासून रोखण्यात येऊ नये. घडलेल्या प्रकाराची कोणतीही चौकशी करण्याची गरज नाही. पण, यामागे कोण आहे, हे सर्वांना माहिती आहे,” असे म्हणत मुरलीधरण यांनी काँग्रेसचे नेते आणि विरोधी पक्षनेते व्ही डी सतीसन यांच्यावर अप्रत्यक्षपणे हल्लाबोल केला आहे.
हेही वाचा : काँग्रेसकडून ‘औकात दाखवून देऊ’ची टीका; आता थेट मोदींकडून हल्लाबोल, म्हणाले “वीज, पाणी…”
दरम्यान, काँग्रेस अध्यक्षपदाच्या निवडणुकीत शशी थरुर यांना पाठिंबा देणारे कोझिकोडचे खासदार एम के राघवन यांनी व्याख्यान रद्द करण्यामागे कोणाची हात होता, याच्या चौकशीची मागणी केली आहे. तर, युवक काँग्रेसला व्याख्यान रद्द करण्यासाठी पक्षातील कोणीतरी निर्देश दिले होते, असे कोझिकोडचे जिल्हाध्यक्ष प्रवीण कुमार यांनी सांगितलं. पण, अधिक माहिती देण्यास कुमार यांनी नकार दिला.
