मारकडवाडीवरून कलगीतुरा, निवडणूक यंत्रणेबद्दल अविश्वास दूर करा; शरद पवारांचे मारकरवाडीत प्रतिपादन

सोलापूर जिल्ह्यातील माळशिरस तालुक्यातील मारकडवाडी हे गाव ईव्हीएमविरोधी म्हणून प्रसिद्ध झाले आहे. या गावाला शरद पवारांनी भेट दिली. या वेळी राष्ट्रवादी काँग्रेस (शरद पवार) पक्षाचे प्रदेशाध्यक्ष जयंत पाटील, विद्या चव्हाण, ज्येष्ठ नेते विजयसिंह मोहिते पाटील, खासदार धैर्यशील मोहिते पाटील, आमदार उत्तम जानकर आदी उपस्थित होते. मारकडवाडी गावात शरद पवारांनी ग्रामस्थांशी संवाद साधला. यावेळी माळशिरसचे राष्ट्रवादी काँग्रेसचे नूतन आमदार उत्तम जानकर यांनी ईव्हीएम मतदानावर आक्षेप घेतला, तर प्रदेशाध्यक्ष जयंत पाटील यांनी पोस्टल मतदानाबाबत आकडेवारी सांगून नवीन मुद्दा उपस्थित केला.

हेही वाचा >>>आमदारांच्या शपथविधीवर विरोधकांचा बहिष्कार

पोस्टल मतदानात भाजपा, शिंदेंची शिवसेना, अजित पवारांची राष्ट्रवादी यांना कमी जागेवर आघाडी मिळाली आणि जास्त जागा जिंकल्या, तर या उलट महाविकास आघाडीला पोस्टल मतदानात जास्त जागेवर आघाडी मिळाली मात्र कमी जागा जिंकल्या असे सांगत पुन्हा जुन्या पद्धतीचे मतदान घ्या, अशी मागणी पाटील यांनी केली. तर खासदार धैर्यशील मोहिते पाटील यांनीदेखील आपल्या मनोगतात ईव्हीएमचा विरोध केला. त्या नंतर शरद पवारांनी आपल्या भाषणातून सरकारवर टीका केली. तुमच्या गावात जमावबंदी का लागू केली, तुमच्या समाधानासाठी तुम्ही पुन्हा मतदान करण्याचा निर्णय घेतला त्याला बंदी कशी, असे सवाल उपस्थित करत पवारांनी याबाबत गावकऱ्यांना सर्व कागदपत्रे मला द्या, असे सांगितले. या वेळी ‘ईव्हीएम’बाबत ग्रामस्थ व महिलांनी भाषणातून कडाडून विरोध केला.

हेही वाचा >>>शरद पवार यांचे निष्ठावंत गुलाबराव देवकर अजित पवार गटात प्रवेश करणार, सोमवारी भेट

आम्हाला ईव्हीएमने मतदान नको. आम्हाला जुन्या पद्धतीने मतदान पाहिजे. शक्य असेल तर तालुक्यातील सर्व गावांत ठराव करा, त्या ठरावाची प्रत आम्ही मुख्यमंत्री, पंतप्रधान, निवडणूक आयोगाकडे देऊ असे पवार यावेळी म्हणाले. दरम्यान, जर पुन्हा मतदान झाले तर भाजपला जास्त मते मिळतील, असा दावा भाजपचे राम सातपुते यांनी केला.