लोकसत्ता विशेष प्रतिनिधी
अलिबाग : महिला व बालविकास मंत्री आदिती तटकरे यांना रायगडचे पालकमंत्रीपद दिल्यानंतर, शिवसैनिक चांगलेच संताप अनावर झाला. त्यांनी महाड नांगलवाडी येथे रात्री निदर्शने करत मुंबई गोवा महामार्ग दोन तास रोखून धरला. सुनील तटकरे यांचा निषेध करत त्यांनी टायर्सची जाळपोळही केली.
गेल्या महिन्याभरापासून प्रतिक्षेत असलेली पालकमंत्रीपदाची यादी राज्यसरकारच्या वतीने शनिवारी संध्याकाळी जारी करण्यात आली. शिवसेना आमदारांचा विरोध डावलून रायगडचे पालकमंत्रीपद राष्ट्रवादी काँग्रेसच्या आदिती तटकरे यांना देण्यात आले. त्यामुळे रायगडच्या पालकमंत्रीपदाच्या आस लावून बसलेल्या भरत गोगावले यांच्या पदरी घोर निराशा आली. त्यांना रायगडचे पालकमंत्री पद मिळाले नाहीच, पण इतर जिल्ह्याचे पालकमंत्रीपदही दिले नाही. त्यामुळे शिवसैनिकांचा संताप अनावर झाला.
आणखी वाचा-रायगडच्या पालकमंत्रीपदाचा निर्णय चुकीचा, भरत गोगावले यांनी व्यक्त केली नाराजी
शनिवारी रात्री उशीरा शिवसैनिक रस्त्यावर उतरले. त्यांनी महाड शहरालगत नांगलवाडी फाट्यावर उतरून निदर्शनाला सुरूवात केली. शेकडो शिवसैनिकांनी मुंबई गोवा महामार्गाची वाहतूक जवळपास दोन तास रोखून धरली. टायर्सची जाळपोळ करण्यात आली. वारंवार विनंती करूनही शिवसैनिक मागे हटण्यास तयार नव्हते. अग्निशमन दलाला पाचारण करून टायर्सची आग विझवण्यात आली. गोगावले समर्थकांनी यावेळी तटकरे यांच्या विरोधात जोरदार घोषणाबाजी केली. सुनील तटकरे यांनी भरत गोगावले यांच्या पाठीत खंजीर खुपसल्याचा आरोप त्यांनी केला. गोगावलेच पालकमंत्रीपदी हवेत अशा घोषणा दिल्या गेल्या. कोकणात सगळे आमदार शिवसेना भाजपचे असूनही रायगडचे पालकमंत्रीपद राष्ट्रवादी काँग्रेसला का असा सवाल कार्यकर्ते उपस्थित करत होते.
राज्यात शिवसेना भाजपचे सरकार आणण्यात भरत गोगावले यांचा मोठा वाटा होता. मात्र तरीही त्यांना डावलून रायगडचे पालकमंत्रीपद आदिती तटकरे यांना देण्यात आले. हा गोगावले यांच्यावर झालेला अन्याय आहे. त्यामुळे जोवर रायगडचे पालकमंत्रीपद गोगावले यांना मिळणार नाही तोवर आंदोलन सुरूच ठेवणार असल्याचे निर्धार संतापलेल्या कार्यकर्त्यांनी व्यक्त केला. जवळपास दोन तास मुंबई गोवा महामार्गावरील वाहतूक शिवसैनिकांनी रोखून धरली होती. अखेर पोलीसांनी त्यांची समजूत काढून महामार्ग मोकळा केला. आणि वाहतूक सुरळीत केली.
