शिंदेंच्या छावणीतून सुटकेसाठी नितीन देशमुख यांचा ‘गनिमी कावा’!

छत्रपती शिवाजी महाराजांनी ज्या प्रमाणे स्वत:ची सुटका करून घेतली होती, त्याच घटनेला आदर्श मानून आपण शिताफीने परत आलो, असे आमदार नितीन देशमुख यांनी ‘लोकसत्ता’शी बोलतांना सांगितले. दरम्यान, एकनाथ शिंदे यांनी मात्र असे काहीच घडले नसून आमच्याच दोन सहकाऱ्यांनी त्यांना विमानतळावर सोडले, असा दावा केला.

गुवाहाटी विमानतळावरून नागपूरला येण्यासाठी आमदार देशमुख यांच्या करिता खासगी विमानाची व्यवस्था करण्यात आली होती. ‘व्हेंचुरा एव्हिएशन’ कंपनीचे ‘व्हीटी-व्हीआरएस’ हे विमान असल्याची माहिती आहे. या खासगी विमानाची व्यवस्था नेमकी कुणी व कशी केली, हा प्रश्न गुलदस्त्यात आहे. नितीन देशमुख यांनी विशेष खासगी विमानाने परत नागपूरमार्गे अकोला गाठण्यामागे नेमकी कोणती राजकीय समीकरण आहेत, यावरून चर्चा सुरू झाली आहे.