वक्फ विधेयक बहुमताने होणार मंजूर? संसदेतील आकडेवारीचं गणित काय सांगतं?

Waqf Bill Lok Sabha Updates in Marathi : गेल्या अनेक महिन्यांपासून देशभरात चर्चेच्या केंद्रस्थानी आलेलं वक्फ सुधारणा विधेयक आज लोकसभेत मांडलं जाणार आहे. प्रश्नोत्तराच्या तासानंतर दुपारी १२ वाजेपासून या विधेयकावर सभागृहात आठ तास चर्चा होणार आहे. विरोधकांच्या इंडिया आघाडीने वक्फ सुधारणा विधेयकाला आधीपासूनच तीव्र विरोध केला आहे. कोणत्याही परिस्थितीत हे विधेयक मंजूर होऊ द्यायचं नाही, असा चंगच विरोधकांनी बांधला आहे. मात्र, असं असलं तरी वक्फ विधेयक संसदेत बहुमतानं मंजूर होण्याची दाट शक्यता आहे. यामागचं कारण म्हणजे सत्ताधाऱ्यांकडं प्रचंड बहुमत आहे. त्या तुलनेत इंडिया आघाडीचं संख्याबळ कमी पडू शकतं, असा अंदाज राजकीय विश्लेषकांनी बांधला आहे. दरम्यान, संसदेत कोणत्या पक्षाकडे किती संख्याबळ आहे? याबाबत जाणून घेऊ…

लोकसभेची सध्या राजकीय पक्षांच्या खासदारांची एकूण संख्या ५४३ इतकी आहे, ज्यामध्ये भाजपाच्या नेतृत्वाखालील राष्ट्रीय लोकशाही आघाडीतील २९३ सदस्य आहेत. त्या तुलनेत इंडिया आघाडीकडे एकूण २३५ खासदार आहेत, ज्यामध्ये एआयएमआयएम, वायएसआरसीपी आणि आझाद समाज पक्ष यांसारख्या पक्षांचा समावेश आहे, ज्यांनी वक्फ विधेयकाला तीव्र विरोध दर्शवला आहे. तसं पाहता संसदेत कोणतंही विधेयक बहुमतानं मंजूर करण्यासाठी २७२ मतांची आवश्यकता असते, त्यामुळे सत्ताधारी हा जादुई आकडा सहज पार करतील, असं मत राजकीय विश्लेषकांनी व्यक्त केलं आहे.