लोकसत्ता प्रतिनिधी
पुणे : अत्याचार, तसेच अश्लील कृत्य केल्याने १५ वर्षीय मुलाने गळफास घेऊन आत्महत्या केल्याची धक्कादायक घटना उघडकीस आली. याप्रकरणी सहकारनगर पोलिसांनी एका तरुणाला अटक केली. त्याच्याविरुद्ध बालकांचे लैंगिक अत्याचारांपासून संरक्षण कायद्यान्वये (पोक्सो), तसेच आत्महत्येस प्रवृत्त केल्याप्रकरणी गुन्हा दाखल करण्यात आला.
संकेत राजेश मोहिले (वय २६, रा. धम्मपाल संघाजवळ, ३१८ भवानी पेठ आणि मोहननगर, धनकवडी) असे अटक करण्यात आलेल्या तरुणाचे नाव आहे. याबाबत मुलाच्या वडिलांनी सहकारनगर पोलीस ठाण्यात फिर्याद दिली आहे. पीडित मुलगा आणि आरोपी संकेत मोहिले यांची ओळख होती. मोहिलेने मुलाला आमिष दाखवून वर्षभरापूर्वी तळजाई टेकडी परिसरात नेले. तेथे त्याने मुलाबरोबर अश्लील कृत्य, तसेच अनैसर्गिक अत्याचार केले. मोहिलेने मोबाइलवर छायाचित्रे काढली. त्यानंतर त्याने मुलाला धमकाविण्यास सुरुवात केली.
आणखी वाचा-पुण्यात होणार नव्याने प्रभाग रचना, काय आहे कारण ?
मुलाच्या मोबाइल क्रमांकावर संपर्क साधून त्याला धमकावले. त्रासामुळे मुलाने १५ नोव्हेंबर रोजी राहत्या घरात गळफास घेऊन आत्महत्या केली. त्यानंतर मुलाच्या वडिलांनी पोलिसांकडे तक्रार दिली. चौकशीत मोहिलेने मुलावर अत्याचार करुन त्याला आत्महत्येस प्रवृत्त केल्याचे उघड झाले. त्यानंतर याप्रकरणी मोहिलेला अटक करण्यात आली. वरिष्ठ पोलीस निरीक्षक छगन कापसे यांनी घटनास्थळी भेट दिली असून, सहायक पोलीस निरीक्षक पवार तपास करत आहेत.
