पीएमआरडीएच्या घरांना प्रतिसाद; सदनिकेसाठी १ हजार ९३२ नागरिकांची नोंदणी

पीएमआरडीएकडून १ हजार ३३७ शिल्लक सदनिकांसाठी लाॅटरी काढण्यात आली आहे. त्याअंतर्गत पेठ क्रमांक १२ येथील प्रधानमंत्री आवास योजनेअंतर्गत आर्थिकृष्ट्या दुर्बल घटक प्रवर्गातील (ईडब्ल्यूएस) ४७ सदनिका, कमी उत्पन्न गट (एलआयजी) प्रवर्गासाठी ६१४ सदनिका आणि पेठ क्रमांक ३०-३२ येथील परवडणारी घरे योजनेअंतर्गत ३४७ सदनिका आणि एलआयजी प्रवर्गातील ३२९ सदनिका अशा एकूण १ हजार ३३७ सदनिका उपलब्ध आहेत.

हेही वाचा >>> सीबीआय अधिकारी असल्याचे सांगत उद्योजकाकडून १२ लाख उकळण्याचा पोलिसांचा प्रयत्न; वाचा काय आहे नेमके प्रकरण?

प्रधानमंत्री आवास योजनेअंतर्गत आर्थिकदृष्ट्या दुर्बल घटक प्रवर्गातील सदनिकांचा आकार २९.५५ चौरस मीटर असून सदनिकांची किंमत १५ लाख ७४ हजार ४२४ एवढी आहे. कमी उत्पन्न गटातील सदनिकांचे क्षेत्र ५९.२७ चौरस मीटर असून किंमत ३५ लाख ५७ हजार २०० एवढी निश्चित करण्यात आली आहे. परवडणारी घरे योजनेअंतर्गत सदनिकांचे क्षेत्र २५.५२ चौरस मीटर आणि किंमत २० लाख ९० हजार ७७१ एवढी तर, कमी उत्पन्न गटातील सदनिकांचा आकार ३४.५७ चौरस मीटर असून त्याची किंमत २८ लाख ३२ हजार २०८ एवढी आहे. त्यासाठी आतापर्यंत १ हजार ९३२ नागरिकांनी संकेतस्थळावर नोंदणी केल्याची माहिती पीएमआरडीए प्रशासनाकडून देण्यात आली. परिपूर्ण अर्ज २९९ नागरिकांनी भरले असून २१८ अर्जदारांनी अनामत रक्कम भरली असून त्यांचे परिपूर्ण अर्ज पीएमआरडीएला प्राप्त झाले आहे. उर्वरित अर्ज कागदपत्रांच्या पुर्ततेअभावी अर्जदारांकडून अपूर्ण आहेत. परंतु, त्यांची प्राथमिक नोंदणीची झाली आहे. परवडणाऱ्या घरांसाठी अर्ज करण्याची मुदत १२ नोव्हेंबर पर्यंत आहे, असे पीएमआरडीएकडून स्पष्ट करण्यात आले.