पुणे : इंटरनेट पुरवठादार परवाना मिळवून देण्याच्या आमिषाने एका महिलेची २० लाख ९२ हजार ३९९ रुपयांची फसवणूक करण्यात आल्याचा प्रकार उघडकीस आला. याप्रकरणी भारती विद्यापीठ पोलिसांकडून तिघांविरुद्ध गुन्हा दाखल करण्यात आला आहे. आरोपींनी तक्रारदार महिलेकडे मंत्रालयात लिपिक असल्याची बतावणी केली होती.
याबाबत एका ४३ वर्षीय महिलेने भारती विद्यापीठ पोलीस ठाण्यात फिर्याद दिली आाहे. त्यांनी दिलेल्या फिर्यादीनुसार सुनील नामदेव गडकर, किरण सुनिल गडकर (दोघेरी रा. भिंताडे नगर, आंबेगाव) यांच्यासह एका महिलेविरुद्ध गुन्हा दाखल करण्यात आला आहे. तक्रारदार महिला भारती विद्यापीठ भागात राहायला आहे. तक्रारदार महिला आणि त्यांच्या पतीची आरोपींशी एका व्यायामशाळेत ओळख झाली. त्यावेळी आरोपी सुनील गडकरने मंत्रालयात लिपिक असल्याची बतावणी त्यांच्याकडे केली होती. मंत्रालयात उच्चपदस्थ अधिकाऱ्यांशी ओळख असल्याची बतावणी त्याने केली होती.
हेही वाचा – वक्फ सुधारणांबाबत केंद्रीय मंत्र्याचे भाष्य; म्हणाले, “अपप्रचार नको…”
इंटरनेट पुरवठादारासाठी लागणारा परवाना (आयएसपी सी क्लास) मिळवून देतो, असे आमिष त्याने दाखविले. आरोपी सुनील गडकर, त्याची पत्नी किरण आणि साथीदार महिलेने तक्रारदाराकडून २० लाख ९२ हजार ३९९ रुपये घेतले. त्यानंतर त्यांना परवाना मिळवून दिला नाही, असे फिर्यादीत म्हटले आहे. पोलीस उपनिरीक्षक निलेश मोकाशी तपास करत आहेत.
आरोपी गडकर दाम्पत्याविरुद्ध फसवणुकीचे दोन गुन्हे
आरोपी सुनील गडकर याच्याविरुद्ध विश्रामबाग आणि भारती विद्यापीठ पोलीस ठाण्यात फसवणुकीचे दोन गुन्हे दाखल आहेत. म्हाडाच्या गृहप्रकल्पात विशेष कोट्यातून सदनिका मिळून देण्याच्या आमिषाने गडकर आणि त्याच्या पत्नीने कर्वेनगर भागातील एका महिलेची ३८ लाखांची फसवणूक केली होती.
