औंधमधील कस्तुरबा वसाहतीत दुध टाकण्यासाठी गेलेल्या तरुणाची कोयत्याने वार करुन हत्या केल्याची घटना गुरुवारी सकाळी साडे पाचच्या सुमारास घडली. रोहित जुनवणे (वय २८) असे या मृत्यू झालेल्या तरुणाचे नाव असून या प्रकरणातील संशयित आरोपी हा सराईत गुन्हेगार असल्याचे समजते.
रोहित जुनवणे याचा दुधाचा व्यवसाय असून गुरुवारी सकाळी तो नेहमीप्रमाणे वसाहतीत दुध टाकण्यासाठी गेला होता. रोहित वसाहतीत येताच दबा धरुन बसलेल्या मारेकऱ्यांनी त्याला गाठले. त्यांनी रोहितवर कोयत्याने १० वेळा सपासप वार केले. या हल्ल्यात रोहित गंभीर जखमी झाला. यानंतर हल्लेखोर पळून गेले. स्थानिकांना रक्ताच्या थारोळ्यात पडलेला रोहित दिसताच त्यांनी याची माहिती पोलिसांना दिली. रोहितला रुग्णालयात दाखल करण्यात आले. मात्र, उपचारादरम्यान मृत्यू झाला होता. हल्ला करणारा संशयित आरोपी हा सराईत गुन्हेगार असल्याचे समजते. या प्रकरणी चतु:श्रृंगी पोलीस अधिक तपास करत आहेत.
