पिंपरी : शहर पोलीस दलाच्या आस्थापनेवरील पोलीस शिपाई पदांच्या २६२ जागांसाठी मैदानी चाचणी पूर्ण झाल्यानंतर आता दहा ऑगस्ट रोजी लेखी परीक्षा होणार आहे. ताथवडे येथील श्री बालाजी विद्यापीठात सकाळी दहा वाजता ही परीक्षा होणार आहे. त्यासाठी २९८९ उमेदवार पात्र ठरले आहेत. तर, मैदानी चाचणीत १२ हजार उमेदवार बाहेर पडले आहेत. पिंपरी-चिंचवड शहर पोलीस दलात २६२ शिपायांच्या जागा भरल्या जाणार आहेत. त्यामध्ये सर्वसाधारण उमेदवारांसाठी ७९, महिला ७८, खेळाडू १५, प्रकल्पग्रस्त १४, भूकंपग्रस्त चार, माजी सैनिक ४१, अंशकालीन पदवीधर ११, पोलीस पाल्य सात, गृहरक्षक दल १३ आणि अनाथांसाठी तीन जागा राखीव आहेत. भरतीप्रक्रियेत १९ जून ते ११ जुलै दरम्यान शारीरिक चाचणी घेण्यात आली. त्यामध्ये किमान ५० टक्के गुण मिळवणाऱ्या उमेदवारांमधून १:१० प्रमाणात उमेदवारांना लेखी परीक्षेसाठी बोलावले आहे. त्या उमेदवारांची शंभर गुणांची लेखी परीक्षा घेण्यात येईल. उमेदवारांनी लेखी परीक्षेत किमान ४० टक्के गुण मिळवणे आवश्यक आहे. ४० टक्क्यांहून कमी गुण मिळवणारे उमेदवार अपात्र समजले जातील. हेही वाचा - औद्योगिकनगरीतील उद्योगांमध्ये घट, १२६ औद्योगिक भूखंडाचे निवासी, वाणिज्यिक वापरात रुपांतर हेही वाचा - पुढील तीन दिवस पावसाचे; किनारपट्टी, घाटमाथा, विदर्भात जोर मैदानी चाचणीतून १२ हजार उमेदवार बाहेर २६२ जागांसाठी राज्यभरातून १५ हजार ४२ अर्ज आले. त्यामध्ये वकील, डॉक्टर, अभियंत्यांसह पदव्युत्तर पदवीधारकांचादेखील समावेश होता. मात्र, मैदानी चाचणीत उत्तीर्ण होऊन लेखीसाठी २९८९ उमेदवार पात्र ठरले. उर्वरित १२ हजार ५३ उमेदवार मैदानी चाचणीमधून बाहेर पडले.
