‘कबीर कला मंच’ चे तीन सदस्य ताब्यात – चौकशी करून सोडून दिले

सोमाटणे फाटा येथील आंदोलनात सहभागी झालेल्या कबीर कला मंचच्या तीन सदस्यांना तळेगाव दाभाडे पोलिसांनी चौकशीसाठी ताब्यात घेऊन नंतर
त्यांना सोडून दिले. त्यांना ताब्यात घेतल्यानंतर भारिप बहुजन महासंघाच्या कार्यकर्त्यांनी त्यांना सोडावे, या मागणीसाठी पोलीस ठाण्यावर मोर्चा काढला.
दीपक ढेंगळे, सिद्धार्थ भोसले आणि रूपाली जाधव अशी ताब्यात घेऊन चौकशी केलेल्यांची नावे आहेत. तळेगाव पोलिसांनी दिलेल्या माहितीनुसार, भंडारा व भालचंद्र डोंगर संरक्षक करावा, या मागणीसाठी संत भूमी संरक्षक संघर्ष समितीच्या वतीने शुक्रवारी सकाळी सोमाटणे फाटा येथे आंदोलन करण्यात आले. या आंदोलनात कबीर कला मंचचे हे तीन सदस्य आणि भारिप बहुजन महासंघाचे कार्यकर्ते सहभागी झाले. या आंदोलनात तिघांनी शासनाने बंदी घातलेली दोन गाणी म्हटल्यामुळे पोलीस उपअधीक्षक विनायक ढाकणे यांनी तिघांना ताब्यात घेऊन चौकशी करून सोडून दिले. याबाबत अपर पोलीस अधीक्षक विजय मगर यांनी सांगितले की, आमच्याकडे असलेल्या माहितीवरून कबीर कला मंचच्या तिघांची चौकशी करून सोडून दिले. त्यांच्याकडे चौकशीत काहीही संशयास्पद आढळून आले नाही. त्या तिघांना एका महाराजांनी बोलाविले होते. रस्ता अडवल्याच्या आरोपावरून त्या महाराजांविरुद्ध गुन्हा दाखल करण्यात आला आहे.