पुणे जिल्ह्यातील विसर्गावरच उजनीत ५० टीएमसी पाणी ; सोलापूरची तहान भागविण्यात पुणे जिल्ह्याचा वाटा

या धरणाच्या पाणलोट क्षेत्रात पाऊस न पडताही केवळ पुणे जिल्ह्यातील धरणांच्या परिसरात पडणाऱ्या पावसामुळे आणि या धरणांमधून होणाऱ्या पाण्याच्या विसर्गामुळे दरवर्षी उजनी धरण १०० टक्के भरते. त्यामुळे पुण्यातील धरणे सोलापूरकरांची तहान दरवर्षी भागवतात, असे म्हटले तर वावगे ठरणार नाही. जिल्ह्याच्या सीमेवरील माढा तालुक्यातील उजनी हे धरण पुणे, नगर आणि सोलापूर जिल्ह्यासाठी महत्त्वाचे आहे. सध्या उजनी जलाशयात १३ हजार २३३ क्युसेक वेगाने पाण्याचा विसर्ग दौंड येथून, तर बंडगार्डन येथून ११ हजार क्युसेकने पाणी सोडण्यात येत आहे. परिणामी उजनीच्या पाणीपातळीत वाढ होत आहे. सध्या हे धरण ९१.५० टक्क्यांपेक्षा जास्त भरले आहे. उजनी धरण भरण्यास केवळ पाच टीएमसी पाण्याची गरज आहे. त्यामुळे उजनीद्वारे सोडण्यात येणाऱ्या पाण्याचा मुख्य सांडवा उघडण्यात आला आहे. या सांडव्यातून ५०० क्युसेकने पाणी सोडण्यास सुरुवात करण्यात आली आहे.