पुणे : शुक्रवारी दिवसभरात जिल्ह्यातील ८०७ नवीन रुग्णांना करोना संसर्गाचे निदान झाले असून पुणे महापालिका हद्दीतील दोन रुग्णांचा करोनाने मृत्यू झाला आहे. राज्याच्या साथरोग सर्वेक्षण विभागाने याबाबत माहिती दिली आहे. मात्र, दिलासादायक बाब म्हणजे जिल्ह्यातील बहुसंख्य करोना रुग्णांना सौम्य लक्षणे असून ते घरच्या घरी बरे होत असल्याने घाबरून जाण्याचे कारण नसल्याचे सार्वजनिक आरोग्य विभागाकडून स्पष्ट करण्यात आले आहे.
शुक्रवारी दिवसभरात आढळलेल्या ८०७ नवीन रुग्णांपैकी ४७३ रुग्ण पुणे महापालिका क्षेत्रात आहेत.
२०१ रुग्ण पिंपरी-चिंचवड महापालिका क्षेत्रात, तर १३३ रुग्ण जिल्ह्याच्या उर्वरित भागात आढळले आहेत. रुग्णांना दिसणारी लक्षणे अत्यंत सौम्य स्वरूपाची आहेत. मात्र, असे असले तरी संसर्गाचा प्रसार रोखण्यासाठी विशेषत: जोखीम गटातील रुग्ण, सहव्याधीग्रस्त आणि ज्येष्ठ नागरिकांनी तसेच लसीकरण न झालेल्या नागरिकांनी मुखपट्टी वापरासह सर्व आवश्यक खबरदारी घेण्याचे आवाहन करण्यात येत आहे. शुक्रवारी आढळलेल्या ८०७ नव्या रुग्णांमुळे पुणे जिल्ह्यातील एकूण करोना रुग्णसंख्या १४ लाख ७७ हजार ५७७ एवढी झाली आहे. राज्य सरकारच्या साथरोग सर्वेक्षण विभागाने दैनंदिन अहवालाद्वारे याबाबत माहिती दिली आहे.
