तीन वेगवेगळ्या नावाने भोसरीत वास्तव्य करणारा बांगलादेशी अटकेत

अटक केलेल्या आरोपीकडे नयन रतन सरकार (वय २१, रा. क्रिष्णापूर, लोहागारा, जि. नराईल, बांगलादेश), राकेश रतन सरकार (रा. घोला नादिया, पश्चिम बंगाल), सुमित शंकर भक्ता (रा. नाकाशी पारा, पश्चिम बंगाल) अशा तीन नावाची कागदपत्रे आढळून आली. त्याचे मूळ नाव नयन सरकार असे आहे. तो सध्या दिघीतील कामगार वसाहतीत वास्तव्य करत होता. त्याने बांगलादेश मधून पश्चिम बंगाल मध्ये अनधिकृतपणे घुसखोरी करून प्रवेश केला. त्यानंतर तो कामाच्या निमित्ताने भोसरीत आला होता.

भोसरी पोलिसांकडून दररोज रात्री सहा ते नऊ या कालावधीत नाकाबंदी लावली जाते. रविवारी नाकाबंदी सुरु असताना नयन संशयितपणे जात असल्याचे पोलिसांच्या निदर्शनास आले. त्याच्याकडे चौकशी केली असता त्याच्या बोलण्यात तफावत आढळून आली. त्याच्याकडील पिशवीची तपासणी केली असता त्यामध्ये वेगवेगळ्या नावाची कागदपत्रे आढळून आली. तो बांगलादेशी असल्याचे निदर्शनास आले. पश्चिम बंगाल येथील भारतीय मतदान ओळखपत्र, बांगलादेश येथील लोहागारा, जि. नराईल येथील लक्ष्मीपाशा आदर्श सेकंडरी स्कुल या शाळेचा दाखला आढळून आला. पोलिसांनी नयन याला अटक केली. परकीय नागरिक आदेश, परकीय नागरिक कायदा यासह भारतीय न्याय संहितेच्या विविध कलमान्वये गुन्हा दाखल करण्यात आला आहे. तो मागील एक वर्षापासून पिंपरी-चिंचवड शहरात बेकायदेशीर वास्तव्य करत असल्याचे पोलिसांनी सांगितले. उपहारगृह आणि बांधकाम प्रकल्पावर काम करत होता. त्याला तीन दिवसांची पोलीस कोठडी मिळाली आहे. पोलीस उपनिरीक्षक श्रीकांत गुरव तपास करीत आहेत.