लोकसत्ता प्रतिनिधी
पुणे: शेअर बाजारात गुंतवणुकीच्या आमिषाने एकाची ४० लाख रुपयांची फसवणूक करण्यात आल्याचा प्रकार उघडकीस आला. याप्रकरणी वानवडी पोलिसांनी एकाविरुद्ध गुन्हा दाखल केला आहे.
याप्रकरणी रवि नरोत्तम ओझा (रा. प्रितम सोसायटी, बिबवेवाडी) याच्याविरुद्ध गुन्हा दाखल करण्यात आला आहे. जॉन पॉलराज व्हिन्सेट ( रा. वानवडी) यांनी या संदर्भात फिर्याद दिली आहे. ओझा याने शेअर बाजारात गुंतवणुकीचे आमिष दाखवून जॉन यांना जाळ्यात ओढले. त्यांनी ओझा याच्यावर विश्वास ठेवून सेवानिवृत्तीनंतर मिळालेले ४० लाख रुपये गुंतवले.
हेही वाचा… तंत्रज्ञानाची कमाल! पुणेरी मेट्रोने ब्रेक दाबताच मिळणार वीज
ओझा याने रक्कम घेतल्यानंतर त्यांना परतावा दिला नाही. परतावा न दिल्याने जाॅन यांनी रक्कम परत करण्यास सांगितले. तेव्हा ओझाने टाळाटाळ सुरु केली. फसवणूक झाल्याचे लक्षात आल्यानंतर जाॅन यांनी पोलिसांकडे तक्रार दिली. ओझाने अशा पद्धतीने अनेकांची फसवणूक केली असल्याचे तपासात निष्पन्न झाले असून, पोलीस उपनिरीक्षक सोनवणे तपास करत आहेत.
