पुणे : कोथरूड परिसरातील सोसायट्यांना भेडसाविणाऱ्या समस्यांबाबबत योग्य ती कार्यवाही करावी आणि पाणीपुरवठा आणि पार्किंगचे प्रश्न सोडविण्यासाठी योग्य त्या उपाययोजना कराव्यात, अशी सूचना पालकमंत्री चंद्रकांत पाटील यांनी केली.
कोथरूड विधानसभा मतदारसंघातील सोसायट्यांच्या प्रश्नासंदर्भात पालकमंत्री चंद्रकांत पाटील यांनी आढावा घेतला. महापालिकेचे अतिरिक्त आयुक्त डॉ. कुणाल खेमणार, विकास ढाकणे, शहर वाहतूक पोलीस उपायुक्त विजयकुमार मगर, पाणीपुरवठा विभागाचे मुख्य अभियंता अनिरुद्ध पावसकर यांच्यासह सोसायट्यांचे पदाधिकारी, सदस्य उपस्थित होते.
सिग्मा वन सोसायटी सोसायटीला पुरेशा दाबाने पाणी मिळत नसल्याने अतिरिक्त गरज भागवण्यासाठी विकत टँकर घ्यावे लागत असल्याने सोसायटीला महानगरपालिकेकडून दररोज किमान एक टँकर पाणी देण्याची व्यवस्था करावी, असे पाटील यांनी सांगितले. सोसायटी एका टोकाला असल्याने पाणीपुरवठ्याची समस्या आहे. शहरात सध्या समान पाणीपुरवठा योजनेचे काम सुरू असून पुढील पाच महिन्यात या सोसायटीला पुरेशा दाबाने पाणीपुरवठा होईल, अशी माहिती पाणीपुरवठा विभागाचे प्रमुख अनिरूद्ध पावसकर यांनी दिली.
एमआयटी संस्थेने आपले पार्किंगचे काम जलदगतीने पूर्ण करण्याचे निर्देश देऊन पाटील म्हणाले, एमआयटीने संस्थेचे विकेंद्रीकरण करावे. एकाच ठिकाणी विद्यार्थीसंख्या वाढणार नाही. महाविद्यालयाच्या परिसरात तंबाखू, सिगारेट आदी पदार्थांची विक्री होऊ नये यासाठी पोलीस विभागाने दैनंदिन गस्‍त घालावी तसेच नियमांचे उल्लंघन करणाऱ्यांवर कठोर कारवाई करावी. यशश्री कॉलनीतील रहिवाशांच्या मागणीच्या अनुषंगाने ग्रीनझोन कमी करण्याच्या अनुषंगाने विकास आराखड्यामध्ये सुधारणेबाबत प्रस्ताव तयार करावा, अशी सूचनाही पाटील यांनी केली.
