पुणे-नगर महामार्गावर शिक्रापूर परिसरात मालवाहू ट्रकची डाॅक्टर दाम्पत्याच्या मोटारीला धडक दिली. अपघातात डॉक्टर महिलेचा मृत्यू झाल्याची घटना घडली.डॉ. सोनाली मच्छिंद्र खैरे (वय ३७) असे मृत्युमुखी पडलेल्या डॉक्टर महिलेचे नाव आहे. अपघातात डॉ. सोनाली यांचे पती डॉ. मच्छिंद्र (वय ४२) जखमी झाले आहेत. त्यांच्यावर रुग्णालयात उपचार सुरू आहेत. या प्रकरणी ट्रकचालक पवन भगवान साठे (वय २५, रा. किनी, जि. बुलढाणा) याच्या विरुद्ध शिक्रापूर पोलिसांनी गुन्हा दाखल केला आहे. डॉ. कैलास बाळासाहेब बांदल यांनी या संदर्भात शिक्रापूर पोलीस ठाण्यात फिर्याद दिली आहे. खैरे यांचे शिक्रापूर परिसरात खैरे हॉस्पिटल आहे. खैरे दाम्पत्य पुणे- नगर महामार्गावरुन मोटारीतून निघाले होते. महामार्गावर शिक्रापूरमधील साई सहारा पेट्रोल पंपावर त्यांनी मोटार थांबविली. पेट्रोल भरुन ते परतत होते. त्या वेळी विरुद्ध दिशेने भरधाव वेगाने आलेल्या ट्रकने मोटारीला धडक दिली. अपघातात मोटारीच्या दर्शनी भागाचा चुराडा झाला. मोटारीतील आसनावर बसलेल्या डॉ. सोनाली गंभीर जखमी झाल्या. उपचारांपूर्वीच त्यांचा मृत्यू झाला.
हेही वाचा >>>पुणे: पत्रकार शशिकांत वारिशे हत्या प्रकरणाचा तपास योग्य दिशेने; पोलीस महासंचालकांची माहिती
अपघातात गंभीर जखमी झालेले डॉ. मच्छिंद्र यांना खासगी रुग्णालयात दाखल करण्यात आले. त्यांची प्रकृती चिंताजनक असल्याने त्यांना तातडीने पुण्यातील खासगी रुग्णालयात हलविण्यात आले. डॉ. खैरे यांचा शिक्रापूर परिसरात जनसंपर्क चांगला आहे. त्यांच्या अपघाताचे वृत्त समजल्यानंतर नागरिकांनी घटनास्थळी धाव घेतली. डॉ. सोनाली यांचा अपघाती मृत्यू झाल्यानंतर परिसरात हळहळ व्यक्त करण्यात आली.
