अभियंता तरुणास मारहाण प्रकरणात आरोपींची न्यायालयीन कोठडीत रवानगी

अभियंता तरुणाला मारहाण केल्याची घटना कोथरूड परिसरातील भेलकेनगर येथे १९ फेब्रुवारीला रात्री घडली होती. या प्रकरणामध्ये  पोलिसांनी गुंड गजानन पंढरीनाथ मारणे (वय ५८) याच्यासह रूपेश कृष्णराव मारणे, ओमतीर्थ राम धर्म जिज्ञासू (वय ३५), किरण कोंडिबा पडवळ (वय ३१), अमोल विनायक तापकीर (वय ३५. सर्व रा. शास्त्रीनगर, कोथरूड) आणि बाब्या ऊर्फ श्रीकांत संभाजी पवार (रा. वडगाव रासाई, शिरूर) या सहा जणांवर महाराष्ट्र संघटित गुन्हेगारी कायद्यानुसार (मकोका) कारवाई केली. यातील रूपेश मारणे आणि बाब्या पवार या आरोपींचा पोलीस अद्याप शोध घेत आहेत.

पोलीस कोठडीची मुदत संपत असल्याने जिज्ञासू, पडवळ आणि तापकीर यांना गुरुवारी न्यायालयात हजर करण्यात आले होते. तर मारणे याला यापूर्वी न्यायालयीन कोठडी सुनावण्यात आली आहे. मारणे टोळीतील सदस्यांची फिर्यादी तरुणाच्या उपस्थित ओळख परेड करण्यात आली. या गुन्ह्यात पोलिसांनी दोन मोटारी आणि दोन दुचाकी जप्त केल्या आहेत. पोलीस कोठडीत असलेल्या आरोपींकडे तपास केला असता ते उडवाउडवीची उत्तरे देत आहेत, अशी माहिती पोलिसांनी न्यायालयात दिली.

गुन्ह्याच्या पुढील तपासासाठी आरोपींनी सात दिवसांची पोलीस कोठडी सुनावण्यात यावी, असा युक्तिवाद सरकारी वकिल विलास पठारे यांनी केला. आरोपींच्यावतीने ॲड. विजयसिंग ठोंबरे यांनी बाजू मांडली. विशेष न्यायाधीश व्ही. आर. कचरे यांनी तीनही आरोपींची न्यायालयीन कोठडीत ठेवण्याचे आदेश दिले.