लोकसत्ता प्रतिनिधी
पुणे : कौटुंबिक वादातून पोलिसांकडे दिलेली तक्रार मागे न घेतल्याने एकाने पत्नीच्या चेहऱ्यावर ॲसिड फेकल्याची घटना हडपसर भागात घडली. याप्रकरणी पतीविरुद्ध गुन्हा दाखल करण्यात आला आहे.
श्रीहरी बभ्रुवान नरवटे (वय ३५, रा. खरोसा, जि .लातूर) असे गुन्हा दाखल केलेल्याचे नाव आहे. याबाबत अनिता श्रीहरी नरवटे (वय ३१, रा. भेकराईनगर, हडपसर) हिने हडपसर पोलीस ठाण्यात फिर्याद दिली आहे. अनिता आणि श्रीहरी यांचा सहा वर्षांपूर्वी विवाह झाला होता. विवाहानंतर त्यांच्यात वाद झाले. अनिताने पतीविरुद्ध पोलिसांकडे तक्रार दिली होती. अनिता पतीपासून वेगळी राहत होती. हडपसर भागातील एका रुग्णालयात ती काम करत होती.
आणखी वाचा-पुणे : वडगाव शेरीत वैमनस्यातून कोयत्याने वार करून तरुणाचा खून
आरोपी श्रीहरी रुग्णालयात आला. आमच्याविरुद्ध पोलिसांकडे दिलेली तक्रार मागे का घेतली नाही, अशी विचारणा करुन त्याने पत्नी अनिताच्या अंगावर ॲसिड फेकले. या घटनेत अनिता जखमी झाली असून, सहायक पोलीस निरीक्षक जाधव तपास करत आहेत.
