भारती विद्यापीठ, तसेच सहकारनगर भागात दहशत माजविणाऱ्या गुंडाविरोधात पोलीस आयुक्त रितेश कुमार यांनी महाराष्ट्र झोपडपट्टी दादा प्रतिबंधक कायद्यान्वये (एमपीडीए) कारवाई करण्याचे आदेश दिले. गुंडाला वर्षभरासाठी कारागृहात स्थानबद्ध करण्यात येणार आहे. पोलीस आयुक्तांनी आतापर्यंत शहरातील चार गुंडांविरोधात ‘एमपीडीए’ कायद्यान्वये कारवाई केली आहे.
हेही वाचा – पुणे : मार्केट यार्ड परिसरात पिस्तूल बाळगणाऱ्या गुंडाला पकडले
अजिंक्य संतोष काळे (वय २१, रा. गणेशनगर, आंबेगाव पठार) असे कारवाई केलेल्या गुंडाचे नाव आहे. त्याच्या विरुद्ध सहा गंभीर गुन्हे दाखल झाले आहेत. काळेविरुद्ध कारवाई करण्याचा प्रस्ताव भारती विद्यापीठ पोलीस ठाण्याचे पाेलीस निरीक्षक श्रीहरी बहिरट आणि गुन्हे प्रतिबंधक विभागाच्या पोलीस निरीक्षक सुरेखा वाघमारे यांनी तयार केला होता. या प्रस्तावास पोलीस आयुक्तांनी मंजुरी दिली. त्यानुसार काळे याला वर्षभरासाठी नाशिक मध्यवर्ती कारागृहात स्थानबद्ध करण्यात येणार आहे.