… म्हणून माझा अभिनयाकडे प्रवास, अभिनेते- दिग्दर्शक सौरभ शुक्ला यांची फिरकी

पुणे : भारतात प्रत्येक मुलाला एक तर क्रिकेटपटू व्हायचे असते नाही तर अभिनेता. त्यानुसार मी सुरुवातीला क्रिकेट खेळायचो. पण, मैदानावर खूप पळायला लागायचे. आपल्याकडून काही होणार नाही हे ध्यानात आल्यावर माझा अभिनयाकडे प्रवास सुरू झाला, अशी टिप्पणी करत प्रसिद्ध अभिनेते-पटकथाकार आणि दिग्दर्शक सौरभ शुक्ला यांनी शनिवारी चक्क मुलाखतकाराचीच फिरकी घेतली. नाटक, चित्रपट हे अनेक कलांच्या मिलाफातून साकारणारे परिपूर्ण व्यासपीठ असल्याचे त्यांनी सांगितले.

दखनी अदब फाउंडेशनच्या वतीने आयोजित चौथ्या डेक्कन लिटरेचर फेस्टिव्हलचे उद्घाटन सौरभ शुक्ला यांच्या हस्ते झाले. त्याप्रसंगी शुक्ला बोलत होते. ज्येष्ठ नाट्यदिग्दर्शक वामन केंद्रे, ज्येष्ठ साहित्यिक वसंत आबाजी डहाके, महोत्सवाच्या मुख्य समन्वयिका मोनिका सिंग, पं. रामदयाल शर्मा, शाहीर सुरेशकुमार वैराळवर, सलीम आरिफ, फाउंडेशनचे जयराम कुलकर्णी, मनोज ठाकूर, रवी तोमर, युवराज शाह या वेळी उपस्थित होते. ‘सौरभ शुक्ला : एक सुगंधित प्रवाह’ अंतर्गत सलीम आरिफ यांनी सौरभ शुक्ला यांच्याशी साधलेल्या संवादातून अभिनेता, लेखक हा प्रवास उलगडला.

आणखी वाचा-मुंबई-पुणे रेल्वे प्रवांशासाठी गैरसोयीचा शनिवार; ब्लॉकमुळे अनेक गाड्या रद्द

शुक्ला म्हणाले, आई-वडील कलाप्रेमी असल्याने मी लहानपणी महिन्याला किमान दहा चित्रपट पाहायचो. जेव्हा मी अभिनयाचे क्षेत्र निवडले तेव्हा घरातून विरोध झाला नाही. जेव्हा नाटकात काम करायला लागलो तेव्हा नाटकाची भाषा मला समजायला अवघड जायची. किमान स्वत:ला कळावे, या हेतूने पुढे मी नाटक लिहायला लागलो. आता लेखन हे माझ्या दैनंदिन आयुष्याचा भाग झाले आहे.

आपण लिहिलेल्या शब्दांत अर्थ लपलेले असतात, असे लेखकाला वाटते. पण, तसे असते तर अभिनेत्याची गरजच भासली नसती. लेखक आणि अभिनेत्याची पार्श्वभूमी वेगवेगळी असते. त्यामुळे प्रत्येक वेळी लेखकाला अभिप्रेत अर्थ अभिनेत्याला समजला आहे, हे गृहीत धरता कामा नये. तो अर्थ समजविण्याचा आणखी प्रयत्न करणे आवश्यक असते, असे सांगून शुक्ला यांनी ‘जॉली एलएलबी’ या चित्रपटातील भूमिकेविषयीचे भाष्य केले.  

ज्येष्ठ रंगकर्मी वामन केंद्रे यावेळी बोलताना म्हणाले, की कोणताही समाज, देश, आणि पर्यायाने विश्व श्रीमंत व्हावे असे आपल्याला वाटत असेल तर भाषेचा विचार होणे गरजेचे आहे. कोणत्याही समजाची श्रीमंती ही त्याच्या कलाप्रधानतेवर ठरते. कलेने समाजात सकारात्मकता येते. विकृती आणि नकारात्मक विचार दूर लोटायचे असतील तर कला महत्त्वाचे काम करते. डेक्कन लिटरेचर फेस्टिव्हलसारख्या बहुभाषिक महोत्सवांची समाजाला गरज आहे.