पुणे : छत्तीसगडमधील रायपूर येथून मेंदुमृत व्यक्तीचे फुफ्फुस पुण्यात आणून त्याचे रुग्णावर प्रत्यारोपण करण्याची कामगिरी डॉक्टरांनी केली आहे. यामुळे या रुग्णाला जीवदान मिळाले आहे. हा रुग्ण स्वाइन फ्लू संसर्गासह गंभीर श्वसनविकाराने त्रस्त होता. त्याचे फुफ्फुस निकामी होऊ लागल्याने त्याला प्रत्यारोपणाची आवश्यकता होती. ग्रीन कॉरिडॉरमुळे रायपूरमधून फुफ्फुस आणून पुण्यातील रुग्णावर त्याचे वेळेत प्रत्यारोपण करणे शक्य झाले.
रायपूरमधील खासगी रुग्णालयात उपचार घेणाऱ्या रुग्णाला मेंदुमृत घोषित करण्यात आले. त्याच्या कुटुंबीयांनी अवयवदानाचा निर्णय घेतला. त्याचे फुफ्फुस पिंपरीतील डीपीयू सुपर स्पेशालिटी हॉस्पिटलमधील रुग्णाला देण्यात आले. काळजीपूर्वक आणि ठरावीक वेळेच्या आतच अवयवांचे प्रत्यारोपण करणे आवश्यक असते. रायपूरहून हवाईमार्गे फुफ्फुस पुणे विमानतळावर आणण्यात आले. त्यानंतर वाहतूक पोलिसांच्या मदतीने ग्रीन कॉरिडॉरद्वारे डीपीयू सुपर स्पेशालिटी हॉस्पिटलमध्ये नेण्यात आले. यासाठी एकूण तीन तासांचा कालावधी लागला. त्यासाठी रायपूर आणि पुणे पोलीस, तसेच विमानतळाच्या अधिकाऱ्यांनी मदत केली. विक्रमी वेळेत १ हजार ३३ किलोमीटर अंतर पार करून छत्तीसगडमधून फुफ्फुस केवळ तीन तासांत पुण्यात पोहोचल्याने ही प्रत्यारोपण शस्त्रक्रिया शक्य झाली.
रुग्णालयात फुफ्फुस पोहोचताच तातडीने रुग्णावर प्रत्यारोपण शस्त्रक्रिया करण्यात आली. रुग्णाने अवयव प्रत्यारोपणाला योग्य प्रतिसाद दिला असून, तो लवकरच बरा होईल, अशी माहिती डॉक्टरांनी दिली. हा रुग्ण स्वाइन फ्लूसह गंभीर श्वसन विकाराने आजारी होता. त्यामुळे त्याला रुग्णालयात दाखल करण्यात आले होते. त्याला एक्स्ट्राकॉर्पोरियल मेंब्रेन ऑक्सिजनेशन (ईसीएमओ) पद्धतीने ऑक्सिजन देण्यात येत होता. आजार अधिक बळवल्याने त्याला फुफ्फुस प्रत्यारोपणाची गरज होती. या रुग्णावर अखेर यशस्वीपणे फुफ्फुस प्रत्यारोपण झाले आहे. डीपीयू सुपर स्पेशालिटी हॉस्पिटलमध्ये गेल्या दोन आठवड्यांमध्ये झालेले हे दुसरे फुफ्फुस प्रत्यारोपण आहे.
आणखी वाचा-‘मुख्यमंत्री माझी लाडकी बहीण’योजनेच्या लाभार्थ्यांना रक्कम वितरणास शनिवारपासून प्रारंभ
अवयवदान हे एक उदात्त कार्य आहे. या बहुमूल्य दानामुळे आम्ही एक मौल्यवान जीव वाचवू शकलो. आम्ही जलद कृती करून वेळेत अवयव आणले आणि त्याचे प्रत्यारोपण केले. रायपूरहून पुण्याला सुखरूप अवयव आणून प्रगत तंत्रज्ञानामुळे आणि कुशल डॉक्टरांच्या साहाय्यामुळे यशस्वीरीत्या प्रत्यारोपण केले. -डॉ. संदीप अट्टावार, डीपीयू सुपर स्पेशालिटी हॉस्पिटल
