पुण्याचे प्रसिद्ध बांधकाम व्यावसायिक अविनाश बोसले यांना सीबीआयने गुरुवारी (२६ मे) अटक केली. त्यांच्यावर येस बँक-डीएचएफएल गैरव्यवहार प्रकरणी ही कारवाई करण्यात आली. त्यांनी या गैरव्यवहारातील रक्कम इतरत्र वळवली असा त्यांच्यावर आरोप आहे. यावर वेगवेगळ्या प्रतिक्रिया उमटत आहेत. अशातच राज्याचे उपमुख्यमंत्री अजित पवार यांना प्रश्न विचारला असता त्यांनी आपली भूमिका स्पष्ट केली.
अजित पवार म्हणाले, “अविनाश भोसले यांना का अटक केली याची मला माहिती नाही. मी सीबीआयला विचारायला जाऊ का? सीबीआय, ईडी या वेगवेगळ्या यंत्रणांना काही माहिती मिळाली तर ते चौकशी करण्यासाठी तुम्हाला बोलावू शकतात. तो त्यांचा अधिकार आहे. त्यामुळे मला अविनाश भोसले यांच्या प्रकरणातील काही माहितीच नाही, तर मी त्यावर काय उत्तर देणार आहे.”
आर्यन खानला एनसीबीने दिलेल्या क्लीन चिटवर बोलताना अजित पवार म्हणाले, “आज त्या तरूण मुलाचं वय किती? त्याच्या आयुष्यातील काही दिवस वाया गेले. त्याला त्यावेळी कितीदा आरोपीच्या पिंजऱ्यात उभं करण्यात आलं. शाहरुख खानचं कुटुंब डिस्टर्ब झालं होतं. स्वतः शाहरूख त्याचं कुठंतरी शुटिंग सुरू होतं ते सोडून दिलं.”
“केंद्राच्या काही चौकशी करणाऱ्या यंत्रणा आहेत, राज्याच्या काही चौकशी करणाऱ्या यंत्रणा आहेत. त्यामुळे कागदपत्रे आणि माहिती मिळाली तर चौकशी केली पाहिजे. कारण तो त्यांचा अधिकार आहे. मात्र, त्यातून निष्पाप लोकांना अडकवलं जाऊ नये, अशी साधारण सर्वच नागरिकांची इच्छा असते,” असं मत अजित पवार यांनी व्यक्त केलं.
अविनाश भोसले यांचं नेमकं प्रकरण काय?
अविनाश भोसले यांच्यावर येस बँक-डीएचएफएल गैरव्यवहारातील रक्कम इतरत्र वळवल्याचा आरोप आहे. हे प्रकरण २०१८ मधील असून, त्यावर्षी एप्रिल ते जून या कालावधीत हजारो कोटी रुपये इतरत्र व्यवहारात आणण्यात आले. त्यासाठी विविध बँक खात्यांचा वापर करण्यात आला होता. त्यातील काही रक्कम अविनाश भोसले यांनी इतरत्र वळवल्याचा आरोप आहे. त्याप्रकरणी सीबीआयने १ मे रोजी पुणे आणि मुंबईत शोध मोहीमही राबवली होती.
येस बँकेचे तत्कालीन अध्यक्ष राणा कपूर यांनी डीएचएफएलमध्ये तीन हजार ७०० कोटी रुपये कर्ज स्वरूपात दिले होते. यात राणा यांना ६०० कोटी रुपये मिळाल्याचा आरोप आहे. त्यानंतर डीएचएफएलने भोसले यांच्याशी संबंधित कंपनीत पैसे वळते केले होते. त्याच्यासोबत बांधकाम व्यावसायिक सुनील छाब्रिया यांच्या रेडियस ग्रुपकडेही हे पेसै गेल्याचे सीबीआयच्या तपासात निष्पन्न झाले होते.
सीबीआयने केलेल्या तपासणीत गैरव्यवहारातील रक्कम इतरत्र वळती करण्यात भोसले यांचा प्राथमिकदृष्टय़ा सहभाग आढळल्यामुळे त्यांना अटक करण्यात आल्याचे सूत्रांनी सांगितले. अविनाश भोसले पुण्यातील प्रसिद्ध व्यवसायिक आहेत. सुरुवातीच्या काळात रिक्षा चालक म्हणून काम करणारे भोसले पुण्यातील मोठे बांधकाम व्यवसायिक झाले. अनेक राजकीय नेत्यांशी त्यांचे चांगले संबंध आहेत.
