पुणे : ससून रुग्णालयाच्या आवारातून दुुचाकी लांबविणाऱ्या एका रुग्णवाहिका चालकाला बंडगार्डन पोलिसांनी अटक केली. त्याच्याकडून सहा दुचाकी जप्त करण्यात आल्या आहेत. सतीश मारुती गंगावणे (वय ३३, रा. पिंपरी गुरव, ता. कर्जत जि. अहमदनगर) असे अटक करण्यात आलेल्याचे नाव आहे. गंगावणे खासगी रुग्णवाहिका चालक आहे. त्याने ससून रुग्णालयाच्या आवारातून दुचाकी चोरल्या होत्या. तो ससून रुग्णालयाच्या परिसरात थांबला असून त्याने दुचाकी चोरीचे गुन्हे केल्याची माहिती बंडगार्डन पोलिसांच्या तपास पथकाला मिळाली.
त्यानंतर पोलिसांच्या पथकाने सापळा लावून त्याला पकडले. गंगावणेने चोरलेल्या दुचाकींची विक्री कर्जत परिसरात केल्याची माहिती तपासात मिळाली आहे. त्याच्याकडून सहा दुचाकी जप्त करण्यात आल्या आहेत. बंडगार्डन पोलीस ठाण्याचे वरिष्ठ पोलीस निरीक्षक संतोष पाटील, गुन्हे शाखेच्या निरीक्षक अश्विनी पाटील यांच्या मार्गदर्शनाखाली उपनिरीक्षक रवींद्र गावडे, मोहन काळे, सुधीर घोटकुले, शंकर संपते, अमोल सरडे आदींनी ही कारवाई केली.
