महायुतीतील नाराजांचा ‘मावळ पॅटर्न’

उपमुख्यमंत्री अजित पवार यांच्या ‘राष्ट्रवादी’चे आमदार सुनील शेळके यांना मावळ भाजपचा तीव्र विरोध आहे. शेळके पूर्वी भाजपमध्येच होते. २०१९ मध्ये बंडखोरी केल्यापासून शेळके यांना भाजप विरोध वाढला. बालेकिल्ला ताब्यातून गेल्याने भाजपचे प्रदेश नेतेही नाराज होते. परंतु, अजित पवार भाजपसोबत सत्तेत सहभागी झाल्याने मावळमधील भाजप पदाधिकाऱ्यांची कोंडी झाली. दीड वर्षे शांत राहिल्यानंतर विधानसभा निवडणुकीच्या पार्श्वभूमीवर आमदार शेळके यांच्या विरोधात छुपा प्रचार सुरू झाला होता. दुसरीकडे, आमदार शेळके यांना स्वपक्षातूनही विरोध वाढण्यास सुरुवात झाली. पक्षाचे तळेगाव दाभाडेचे शहराध्यक्ष व माजी प्रदेश उपाध्यक्ष बापू भेगडे विरोधात गेले. भेगडे यांनी उमेदवारीवरही दावा केला. भेगडे निवडणूक लढविण्यावर ठाम होते. त्यामुळे मावळात बंडखोरी होणार हे निश्चित मानले जात होते. परंतु, ‘मावळ पॅटर्न’ उदयास येईल याचा मात्र कोणालाही अंदाज आला नाही.

हेही वाचा >>>प्रशिक्षणाचा समावेश असलेला नवा पदवी अभ्यासक्रम… कुठे, कधीपासून होणार सुरू?

दरम्यान, मावळ भाजप आणि प्रदेश कार्यकारणी यांच्यात समन्वय होत नाही, तोपर्यंत आपली उमेदवारी जाहीर करू नये, अशी भूमिका आमदार शेळके यांनी घेतली होती. उपमुख्यमंत्री देवेंद्र फडणवीस यांचीही त्यांनी भेट घेतली. त्याच्या दुसऱ्याच दिवशी भाजपचे माजी आमदार बाळा भेगडे यांनीही फडणवीस यांची भेट घेतली. भेगडे हे फडणवीस यांचे निकटवर्तीय मानले जातात. त्यामुळे भेगडे यांच्यासह मावळ भाजपकडून बंडखोर उमेदवाराला पाठिंबा देण्याचा निर्णय होईल, अशी शक्यता वाटत नव्हती. परंतु, बापू भेगडे यांनी अपक्ष निवडणूक लढविण्याची घोषणा करताच भाजपचे प्रदेश उपाध्यक्ष बाळा भेगडे, किसान मोर्चाचे प्रदेशाध्यक्ष गणेश भेगडे यांनी पदांचे राजीनामे देऊन त्यांना पाठिंबा दिला. अर्थात त्यांनी अजून पक्षाच्या सदस्यत्वाचा राजीनामा दिलेला नाही. राजीनामे दिल्यानंतर तत्काळ बैठक घेऊन, या नेत्यांनी बापू भेगडे यांचा प्रचार करण्याचे आवाहन भाजप कार्यकर्त्यांना केले. महायुतीत याचे राज्यभरात कसे पडसाद उमटतात, हे पाहणे औत्सुक्याचे ठरणार आहे.

हेही वाचा >>>पुण्यात अकरावीच्या हजारो जागा रिक्त…विद्यार्थ्यांची प्रवेशाकडे पाठ का?

विधानसभा निवडणुकीत सुनील शेळके यांचा पराभव करणे हेच आमचे लक्ष्य आहे. मावळच्या जनतेच्या आशीर्वादावर बापू भेगडे यांना निवडून आणणार आहोत. योग्य वेळी योग्य प्रयोग करायचा असतो. त्यामुळे मी या वेळी निवडणूक लढविणार नाही. मावळ विधानसभा मतदारसंघात भाजप टिकला पाहिजे, हीच आमची भूमिका आहे. पाच वर्षे आम्ही खूप भोगले. येथे ५० वर्षांनी सर्व पक्ष एकत्र आले आहेत, असे माजी आमदार बाळा भेगडे म्हणाले.

महाविकास आघाडीच्या भूमिकेकडे लक्ष

राष्ट्रवादी (शरद पवार) पक्षाकडून बापू भेगडे यांना उमेदवारी मिळण्याची शक्यता होती. परंतु, भाजप नेत्यांच्या मदतीसाठी त्यांनी अपक्ष लढण्याची भूमिका घेतल्याचे सांगितले जाते. मावळमध्ये महाविकास आघाडीकडे सक्षम उमेदवार नाही. त्यामुळे महाविकास आघाडीकडून भेगडे यांना पाठिंबा दिला जातो, की दुसरा उमेदवार उभा केला जातो, याकडे मतदारसंघाचे लक्ष आहे.