पिंपरी : भोसरी कला, क्रीडा रंगमंचच्या वतीने गुरुवार ( १ सप्टेंबर) पासून पाच दिवसीय भोसरी महोत्सवाचे आयोजन करण्यात आले आहे. या महोत्सवात नाटक, काव्यमैफल, सौंदर्यस्पर्धा आणि लावण्यांचा कार्यक्रम आदींचा समावेश असणार आहे. उत्सवात सर्वांना मुक्त प्रवेश असणार आहे.
संस्थेचे अध्यक्ष ॲड. नितीन लांडगे यांनी ही माहिती दिली.
आमदार महेश लांडगे यांच्या हस्ते महोत्सवाचे उद्घाटन होणार असून माजी खासदार शिवाजीराव आढळराव पाटील अध्यक्षस्थानी असतील. माजी खासदार अमर साबळे, माजी आमदार ज्ञानेश्वर लांडगे, ज्येष्ठ अभिनेते अशोक सराफ, अभिनेत्री निर्मिती सावंत प्रमुख पाहुणे आहेत. उद्घाटनानंतर अशोक सराफ, निर्मिती सावंत यांचे ‘व्हॅक्यूम क्लिनर’ हे नाटक सादर होईल. याशिवाय, छायाचित्रकार नंदू लोंढे यांच्या लेह लडाख येथील छायाचित्रांच्या प्रदर्शनाचे या वेळी उद्घाटन करण्यात येणार आहे.
हेही वाचा : जिल्हाधिकाऱ्यांच्या मंजुरीशिवाय एक-दोन गुंठे जमिनींची दस्त नोंदणी नाहीच
शुक्रवारी (२ सप्टेंबर) सायंकाळी चार वाजता कवी सौमित्र तथा किशोर कदम यांच्या उपस्थितीत काव्य मैफल होईल. शनिवारी (३ सप्टेंबर) सकाळी आंतर शालेय नृत्य स्पर्धा होतील. सायंकाळी ‘भोसरी सौंदर्यवती स्पर्धा’ होईल. रविवारी (४ सप्टेंबर) सायंकाळी ‘भोसरी आयडॉल’ स्पर्धेचे आयोजन करण्यात आले आहे. सोमवारी (५ सप्टेंबर) खासदार डॉ. अमोल कोल्हे यांच्या उपस्थितीत महोत्सवाचा समारोप होईल. तत्पूर्वी दुपारी “बॉईज ३” या चित्रपटातील कलाकारांसोबत गप्पांचा कार्यक्रम होणार आहे. समारोपानंतर “तुमच्यासाठी काय पण” हा लावण्यांचा कार्यक्रम होणार आहे.
