पुणे : शहरात वेगवेगळ्या अपघातात दोन दुचाकीस्वारांचा मृत्यू झाल्याची घटना घडली. नगर रस्त्यावरील वाघोली, तसेच कात्रज भागात अपघाताच्या घटना घडल्या.नगर रस्त्यावर वाघोली परिसरात भरधाव ट्रकच्या धडकेत दुचाकीस्वाराचा मृत्यू झाल्याची घटना घडली. ऋषीकुमार सिंग (वय २८, रा. खराडी) असे मृत्युमुखी पडलेल्या दुचाकीस्वाराचे नाव आहे. याबाबत सिंग यांचा भाऊ गुडन सिंग (वय ४७, रा. फलपुरा, जि. सिवान, बिहार) यांनी लोणीकंद पोलीस ठाण्यात फिर्याद दिली आहे. दुचाकीस्वार ऋषीकुमार सिंग सोमवारी (५ ऑगस्ट) दुपारी पावणेएकच्या सुमारास नगर रस्त्यावरुन निघाले होते. वाघोली परिसरातील बकोरी फाट्याजवळ भरधाव ट्रकने दुचाकीला धडक दिली. अपघातात दुचाकीस्वार सिंग यांचा जागीच मृत्यू झाला. अपघातानंतर पसार झालेल्या ट्रकचालकाविरुद्ध गुन्हा दाखल करण्यात आला आहे. पोलीस कर्मचारी अजित फरांदे तपास करत आहेत.
कात्रज भागातील आंबेगाव खुर्द भागात दुचाकीस्वार घसरून दुचाकीस्वार तरुणाचा मृत्यू झाला. अनिल दिनेश गोरड (वय ३२, रा. अटल चाळ, आंबेगाव खुर्द) असे मृत्यमुखी पडलेल्या दुचाकीस्वाराचे नाव आहे. दुचाकीस्वार अनिल रविवारी (४ ऑगस्ट) रात्री साडेदहाच्या सुमारास आंबेगाव खुर्द येथील अटल चाळ परिसराून निघाले होते. त्यावेळी दुचाकी घसरून गोरड यांच्या डोक्याला गंभीर दुखापत झाली. अपघातात गंभीर जखमी झालेल्या गोरड यांचा उपचारादरम्यान मृत्यू झाला. पोलीस उपनिरीक्षक मोहन देशमुख तपास करत आहेत.
