लोकसत्ता प्रतिनिधी
पुणे : गंभीर गुन्ह्यांच्या तपासात पोलिसांकडून सीसीटीव्ही चित्रीकरण ताब्यात घेतले जाते. चित्रीकरणाद्वारे चोरट्याचा माग काढला जातो. सीसीटीव्ही चित्रीकरणात पकडले जाण्याच्या भीती वाटल्याने चोरट्याने वेशभूषा बदलून दुचाकी चोरीचे गुन्हे केल्याचे उघडकीस आले आहे. दरोडा आणि वाहन चोरी विरोधी पथक, हडपसर पोलिसांनी ही कारवाई केली. चोरट्याकडून १४ दुचाकी जप्त करण्यात आल्या आहेत.
मुज्जफर उर्फ सलमान रफीक पठाण (वय २३, रा. मांजरी) असे अटक करण्यात आलेल्याचे नाव आहे. पठाण याने मौजमजा करण्यासाठी दुचाकी चोरीचे गुन्हे केल्याचे तपासात उघडकीस आले आहे. पठाण दुचाकी चोरी करण्यासाठी पीएमपी बसने शहराच्या वेगवेगळ्या भागात जायचा. दुचाकी चोरल्यानंतर सीसीटीव्ही कॅमेरे टिपण्याची शक्यता असल्याने तो वेशभूषा बदलायचा. सीसीटीव्ही चित्रीकरणात पकडले जाण्याची भीती त्याला वाटत होती. त्यामुळे तो गुन्हा केल्यानंतर आठ ते दहा शर्ट बदलायचा. पोलिसांच्या पथकाने त्याला सापळा लावून पकडले.
आणखी वाचा-पुणे: नदीपात्रात गणपती विसर्जनाला मनाई; हौदांचा वापर करण्याचे महापालिकेचे आवाहन
वरिष्ठ पोलीस निरीक्षक रवींद्र शेळके, पोलीस निरीक्षक विश्वास डगळे, सहायक निरीक्षक विजयकुमार शिंदे, उपनिरीक्षक अविनाश शिंदे, सुशील लोणकर, प्रशांत धुमाळ, निखिल पवार आदींनी ही कारवाई केली.
