पुणे : शहरात साखळी चोरट्यांनी उच्छाद मांडला आहे. दुचाकीस्वार चोरट्यांनी पादचारी ज्येष्ठ महिलांना लक्ष्य केले असून, वेगवेगळ्या घटनेत चोरट्यंनी तीन लाख २० हजार रुपयांचे दागिने चोरून नेले. रविवार पेठ, तसेच सदाशिव पेठ परिसरात या घटना घडल्या.
याबाबत एका ज्येष्ठ महिलेने फरासखाना पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्याविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार ज्येष्ठ महिला या शनिवार पेठेत राहायला आहेत. श्री महावीर जयंतीनिमित्त त्या दर्शनासाठी निघाल्या होत्या.
गुरुवारी (१० एप्रिल) सकाळी साडेसातच्या सुमारास रविवार पेठेत दुचाकीस्वार चोरट्याने त्यांच्या गळ्यातील अडीच लाख रुपयांची सोनसाखळी चोरुन नेली. या घटनेची माहिती मिळताच पोलिसांनी घटनास्थळी भेट दिली. पोलिसांनी सीसीटीव्ही चित्रीकरण तपासले असून, चोरट्याचा माग काढण्यात येत आहे. पोलीस उपनिरीक्षक अरविंद शिंदे तपास करत आहे.
दुसऱ्या एका घटनेत सदाशिव पेठेतील राणा प्रताप उद्यानाजवळ गुरुवारी सकाळी साडेसातच्या सुमारास ज्येष्ठ महिलेच्या गळ्यातील ७० हजार रुपयांचे दागिने हिसकावून नेण्यात आल्याची घटना घडली. याबाबत एका ज्येष्ठ महिलेने खडक पोलीस ठाण्यात फिर्याद दिली आहे. तक्रारदार ज्येष्ठ महिला शुक्रवार पेठेत राहायला आहेत. त्या दररोज सकाळी राणा प्रताप उद्यान परिसरातफ फिरायला जातात. नेहमीप्रमाणे त्या सकाळी फिरायला गेल्या होत्या. राणा प्रताप उद्यानाजवळ दुचाकीस्वार चाेरट्यांनी त्यांच्याकडील ७० हजार रुपयांचे दागिने हिसकावून पळ काढला. पोलीस उपनिरीक्षक प्रल्हाद डोंगळे तपास करत आहेत.
शहरात ज्येष्ठ महिलांकडील दागिने हिसकावण्याच्या घटनांमध्ये वाढ झाली आहे. दागिने चोरणाऱ्या चोरट्यांविरुद्ध कडक कारवाईचे आदेश पोलीस आयुक्त अमितेश कुमार यांनी दिले आहे. दागिने चोरणाऱ्या चोरट्यांविरुद्ध महाराष्ट्र संघटित गुन्हेगारी नियंत्रण कायद्यान्वये (मकाेका) कारवाई करण्याचा इशारा देण्यात आला आहे.
पीएमपी प्रवासी तरुणाचा मोबाइल चोरी
पीएमपी प्रवासी तरुणाकडील मोबाइल संच चोरून नेल्याच्या घटना पुणे स्टेशन परिसरात घडली. याबाबत पिंटू इंद्रेशकुमार पटेल (वय २६, रा. आंबेगाव) याने बंडगार्डन पोलीस ठाण्यात फिर्याद दिली आहे. पोलिसांनी दिलेल्या माहितीनुसार, पिंटू कामानिमित्त चाकण परिसरात स्थायिक झाला आहे. तो मूळचा परगावातील आहे. पुणे स्टेशन परिसरातून तो पीएमपी बसने चाकणकडे निघाला होता. सकाळी साडेसातच्या सुमारास पीएमपी बसमध्ये प्रवेश करताना चोरट्याने त्याच्याकडील मोबाइल हिसकावून पळ काढला. पोलीस उपनिरीक्षक गणेश चव्हाण तपास करत आहेत.
