पुणे : भरधाव मोटारीच्या धडकेत दुचाकीस्वार तरुणाचा मृत्यू झाल्याची घटना डेक्कन जिमखाना भागातील खंडोजीबाबा चौकात घडली.विनायक साहेबराव थेटे (वय ३०, कोल्हार, भगवतीपूर, ता. राहता. जि. अहिल्यानगर) असे मृत्युमुखी पडलेल्या दुचाकीस्वाराचे नाव आहे. याप्रकरणी मोटारचालकाविरुद्ध गुन्हा दाखल करण्यात आला. याबाबत विनायक यांचे काका राहुल थेटे (वय ३४, रा. रहाटणी, पिंपरी-चिंचवड) यांनी डेक्कन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, दुचाकीस्वार विनायक रविवारी रात्री अकराच्या सुमारास डेक्कन जिमखाना भागातील खंडोजीबाबा चौकातून निघाले होते. त्या वेळी भरधाव मोटारीने दुचाकीस्वार विनायक यांना धडक दिली. अपघातात गंभीर जखमी झालेल्या विनायक यांना तातडीने खासगी रुग्णालयात दाखल करण्यात आले. उपचारांदरम्यान त्यांचा मृत्यू झाला. पोलीस उपनिरीक्षक दत्तात्रय सावंत तपास करत आहेत.
