पिंपरी-चिंचवड: रूग्णालयात बर्थ डे सेलिब्रेशन, ४० युवकांनी घातला गोंधळ

वायसीएम रूग्णालयात एका महाविद्यालयीन युवकावर उपचार सुरू आहेत. त्याचा रविवारी वाढदिवस होता. वाढदिवस साजरा करण्यासाठी ४० ते ५० युवक चक्क रूग्णालयात पोहोचले. त्यांनी रूग्णालय परिसरात वाढदिवस साजरा केला. सुरूवातीला या सर्वांनी रूग्णालय परिसरात केक कापला, पिपाण्या वाजवत उच्छाद मांडला. त्यानंतर थेट रूग्णालयात घुसून आरडाओरड करत शुभेच्छा दिल्या. त्यांच्या या सेलिब्रेशनमुळे रूग्ण भयभीत झाले होते. हा सर्व प्रकार सीसीटीव्हीत कैद झाला आहे. रूग्णालयाच्या सुरक्षा विभागाने त्वरीत पिंपरी पोलिसांना याची माहती दिली. पोलिसांनी २४ जणांना ताब्यात घेऊन प्रतिबंधात्मक कारवाई करत नंतर सर्वांना सोडून दिले.