शिवसेनेच्या माजी नगरसेवकांचा पक्ष प्रवेश अन् भाजपमध्ये बँनरबाजी ! पुणे भाजपमधील अंतर्गत वाद उफाळला फ्लेक्स लावून नाराजी व्यक्त

पक्ष वाढीसाठी गेली अनेक वर्षे काम करणाऱ्या स्थानिक कार्यकर्त्यांकडे आणि पदाधिकाऱ्यांकडे दुर्लक्ष करून राज्यात आणि केंद्रात वजन वाढविण्यासाठी हे पक्ष प्रवेश करून घेण्यात येत असल्याची चर्चा शहरात सुरू झाली आहे. नुकत्याच झालेल्या पाच माजी नगरसेवकांच्या पक्ष प्रवेशामुळे नाराज झालेल्या भाजपच्या मध्यवर्ती भागातील पदाधिकाऱ्याने फ्लेक्स लावून शेरो शायरीच्या माध्यमातून मनातील खदखद व्यक्त केली आहे. ‘दुश्मनी जमकर करो लेकिन ये गुंजाइश रहे, जब कभी हम दोस्त हो जाएं तो शर्मिंदा न हों’ अशा आशयाचे हे फ्लेक्स आहेत.

हेही वाचा…संकेतस्थळावर माहिती, कागदपत्रे जाहीर न करणाऱ्या शाळांवर कारवाई; सीबीएसईचा इशारा

कसबा पेठ विधानसभा मतदारसंघात येत असलेल्या सोमवार पेठ, मंगळवार पेठ तसेच कँन्टोन्मेंट विधानसभा मतदारसंघातील रास्ता पेठ परिसरात हे फ्लेक्स लावण्यात आलेले आहेत. भाजपचे महापालिकेतील माजी सभागृह नेते गणेश बीडकर यांचे सहकारी असलेले विशाल दरेकर यांचे नाव या फ्लेक्सच्या खाली आहे. यावर पक्ष प्रवेशाबाबत स्पष्टपणे लिहिण्यात आले नसले तरी, यामुळे शहर भाजपमध्ये आगामी महापालिका निवडणुकीच्या पार्श्वभूमीवर अंतर्गत गटबाजी उफाळून येण्याची शक्यता वर्तवली जात आहे.

हेही वाचा…राज्य मंडळाकडून बारावीच्या परीक्षेचे प्रवेशपत्र उपलब्ध

गेल्या काही महिन्यांपासून भाजपचे शहरातील स्थानिक पदाधिकारी आणि राज्यात आणि केंद्रात नेत्यांमधील संघर्ष वाढत असल्याचे चित्र पाहायला मिळत आहे. ज्या कार्यकर्त्यांनी झाड जपले, त्यांच्यावर महापालिका निवडणुकीला फळ चाखण्याची वेळ आली. तेव्हा इतर पक्षातील लोकांना संधी देण्यात येत असल्याची खंत भाजपच्या पदाधिकाऱ्यांकडून व्यक्त केली जात आहे.