पिंपरी पालिकेत लाचखोर सर्व्हेअर जाळ्यात ; तीन लाख रूपयांची लाच मागितली

संदीप फकीरा लबडे (वय-४८) असे या सर्व्हेअरचे नाव आहे. बुधवारी दुपारी तीनच्या सुमारास ही कारवाई झाली. याप्रकरणी ३८ वर्षीय नागरिकाने लाचलुचपत प्रतिबंधक विभागाकडे तक्रार दिली होती. तक्रारदाराच्या कंपनीचे काम या अधिकाऱ्याने अडवून धरले होते. ते करून देण्यासाठी तीन लाख रूपये देण्याची मागणी आरोपीने केली होती. याबाबतची तक्रार लाचलुचपत प्रतिबंधक विभागाला प्राप्त झाली. तक्रारीची शहानिशा केल्यानंतर या विभागाने बुधवारी मुख्यालयात सापळा रचला. त्यानुसार, तक्रारदाराकडून पैसे घेताना आरोपीला अटक करण्यात आली. याप्रकरणी पिंपरी पोलीस ठाण्यात गुन्हा दाखल करण्यात आला आहे. या प्रकरणाचा तपास पोलीस उपअधीक्षक क्रांती पवार करत आहेत.